శేరిలింగంపల్లి, జూన్ 29 (నమస్తే శేరిలింగంపల్లి): దేశ అత్యున్నత పౌర పురస్కారాల్లో ఒకటైన పద్మభూషణ్ అందుకున్న ప్రపంచ ప్రఖ్యాత భారతీయ-అమెరికన్ రేడియేషన్ ఆంకాలజిస్ట్ డా. నోరి దత్తాత్రేయను మెడికవర్ హాస్పిటల్స్ ఘనంగా సత్కరించింది. ఈ సందర్భంగా నిర్వహించిన ప్రత్యేక కార్యక్రమంలో మెడికవర్ ఆంకాలజీ విభాగానికి చెందిన సీనియర్ వైద్యులు, నిపుణులు పాల్గొని ఆయనకు అభినందనలు తెలిపారు. సన్మాన కార్యక్రమం అనంతరం క్యాన్సర్ చికిత్సలో ఆధునిక సాంకేతికత వినియోగం, దేశంలో ఆంకాలజీ రంగ భవిష్యత్, ప్రతి రోగికి నాణ్యమైన క్యాన్సర్ వైద్య సేవలను మరింత అందుబాటులోకి తీసుకురావాల్సిన అవసరంపై డా. నోరి వైద్య బృందంతో విస్తృతంగా చర్చించారు.
ఆంధ్రప్రదేశ్లోని కృష్ణా జిల్లా మంటాడ గ్రామానికి చెందిన డా. నోరి దత్తాత్రేయుడు కర్నూలు మెడికల్ కాలేజీలో ఎంబీబీఎస్ పూర్తి చేసి, ఉస్మానియా మెడికల్ కాలేజీలో ఉన్నత విద్యను అభ్యసించారు. అనంతరం అమెరికాలోని ప్రముఖ క్యాన్సర్ వైద్య సంస్థల్లో విశిష్ట సేవలు అందించారు. ముఖ్యంగా బ్రాకీథెరపీ చికిత్సలో ఆయన చేసిన పరిశోధనలు ప్రపంచవ్యాప్తంగా క్యాన్సర్ చికిత్సలో కొత్త మార్గాలను చూపించాయి. బసవతారకం ఇండో-అమెరికన్ క్యాన్సర్ హాస్పిటల్ అభివృద్ధిలోనూ ఆయన కీలక పాత్ర పోషించారు. ఈ సందర్భంగా మెడికవర్ హాస్పిటల్స్ ఫైనాన్షియల్ డిస్ట్రిక్ట్ సెంటర్ హెడ్ డా. ఎ. శరత్ రెడ్డి మాట్లాడుతూ ప్రపంచ స్థాయి వైద్య విజ్ఞానాన్ని దేశానికి తీసుకువచ్చిన మహోన్నత వ్యక్తి డా. నోరి దత్తాత్రేయుడని అన్నారు. క్యాన్సర్ వైద్య రంగానికి ఆయన అందించిన విశిష్ట సేవలకు పద్మభూషణ్ పురస్కారం అత్యంత సముచిత గౌరవమని, ఆయన ప్రయాణం యువ వైద్యులకు స్ఫూర్తిదాయకమని పేర్కొన్నారు.
మెడికవర్ ఆంకాలజీ కన్సల్టెంట్ డా. రిగ్వేద్ నిట్టాల మాట్లాడుతూ డా. నోరి వైద్య జీవితం ప్రతి ఆంకాలజిస్టుకు ఆదర్శమని, రోగి కేంద్రిత వైద్య సేవలపై ఆయన చూపిన మార్గం తమకు స్ఫూర్తినిస్తోందని తెలిపారు. ఆయనతో జరిగిన చర్చ తమ వైద్య బృందానికి ఎంతో విలువైన అనుభవంగా నిలిచిందన్నారు. సన్మానానికి స్పందించిన డా. నోరి దత్తాత్రేయుడు హైదరాబాద్ తనకు ఎప్పుడూ ప్రత్యేకమైన నగరమని చెప్పారు. ప్రపంచ స్థాయి క్యాన్సర్ చికిత్స ప్రతి రోగికి అందుబాటులోకి రావాలన్నదే తన లక్ష్యమని పేర్కొన్నారు. మెడికవర్ హాస్పిటల్స్ యాజమాన్యం, వైద్య బృందం అందించిన గౌరవానికి హృదయపూర్వక కృతజ్ఞతలు తెలిపారు. ఈ కార్యక్రమంలో మెడికవర్ హాస్పిటల్స్ ఆంకాలజీ విభాగానికి చెందిన డా. మాధాల రవికృష్ణ (మెడికల్ ఆంకాలజిస్ట్)తోపాటు సీనియర్ కన్సల్టెంట్లు, వైద్యులు, నర్సింగ్ సిబ్బంది, ఇతర ఆరోగ్య సిబ్బంది పాల్గొన్నారు.
