శేరిలింగంపల్లి, ఆగస్టు 12 (నమస్తే శేరిలింగంపల్లి): సైబరాబాద్ మున్సిపల్ కార్పొరేషన్ (CMC) చేపట్టిన ప్రతిరోజు ఒక వార్డు కార్యక్రమంలో భాగంగా మియాపూర్ వార్డులో విస్తృత ప్రజా పరస్పర కార్యక్రమం నిర్వహించారు. వార్డు నంబర్ 240 పరిధిలోని డీకే ఎన్క్లేవ్లో జరిగిన ఈ కార్యక్రమంలో CMC కమిషనర్ సృజన స్థానిక ప్రజలు, రెసిడెంట్ వెల్ఫేర్ అసోసియేషన్ల (RWAs) ప్రతినిధులతో నేరుగా మాట్లాడి సమస్యలను తెలుసుకున్నారు. ఈ కార్యక్రమానికి శేరిలింగంపల్లి ఎమ్మెల్యే, జోనల్ కమిషనర్, డిప్యూటీ కమిషనర్తోపాటు ఇంజినీరింగ్, శానిటేషన్, టౌన్ ప్లానింగ్, UBD తదితర విభాగాల అధికారులు, ప్రజాప్రతినిధులు, వివిధ RWAs సభ్యులు హాజరయ్యారు.
సమావేశంలో స్థానికులు పలు పౌర సమస్యలను అధికారుల దృష్టికి తీసుకువచ్చారు. రహదారుల మరమ్మత్తులు, సీసీ రోడ్ల నిర్మాణం, డ్రైనేజీ, వర్షపు నీటి పారుదల పనులు, కాలువల డీసిల్టింగ్, నీటి నిల్వ సమస్యలు, వీధి దీపాల ఏర్పాటు వంటి అంశాలపై ఫిర్యాదులు చేశారు. అదేవిధంగా రహదారి విస్తరణ, ట్రాఫిక్ భద్రత, ఆక్రమణల తొలగింపు, దోమల నియంత్రణ, పార్కుల అభివృద్ధి, భూగర్భ జలాల పునరుద్ధరణ, శానిటేషన్, ఇతర మౌలిక వసతుల అభివృద్ధి అంశాలను కూడా ప్రజలు ప్రస్తావించారు. ప్రజల నుంచి వచ్చిన ప్రతి ఫిర్యాదును CMC కమిషనర్ శ్రద్ధగా విని, సంబంధిత శాఖల అధికారులకు పలు సూచనలు చేశారు. సమస్యలను ప్రాధాన్యత క్రమంలో పరిశీలించి తక్షణ చర్యలు తీసుకోవాలని ఆదేశించారు. నిర్ణీత గడువులో పనులు పూర్తి చేయడంతోపాటు వివిధ శాఖల మధ్య సమన్వయాన్ని మరింత మెరుగుపరచాలని సూచించారు. అభివృద్ధి పనుల్లో జాప్యం లేకుండా చర్యలు వేగవంతం చేయాలని అధికారులకు స్పష్టం చేశారు.
ప్రతిరోజు ఒక వార్డు కార్యక్రమం ద్వారా పరిపాలనను ప్రజలకు మరింత చేరువ చేయడం, క్షేత్రస్థాయిలో స్థానిక సమస్యలను ప్రత్యక్షంగా తెలుసుకోవడం, పౌర సేవలను మరింత సమర్థవంతంగా అందించడమే లక్ష్యమని కమిషనర్ తెలిపారు. మియాపూర్ వార్డులో కార్యక్రమం సందర్భంగా స్వీకరించిన ఫిర్యాదులను సమగ్రంగా పర్యవేక్షించి, వాటిపై తగిన చర్యలు తీసుకుంటామని అధికారులు హామీ ఇచ్చారు. పౌర సదుపాయాలను మెరుగుపరచి స్థానికుల జీవన ప్రమాణాలను పెంచేందుకు చర్యలు కొనసాగుతాయని తెలిపారు.
