శేరిలింంగంపల్లి, జూలై 8 (నమస్తే శేరిలింంగంపల్లి): దాదాపు ఎనిమిది నెలలుగా మిస్సింగ్గా నమోదైన మియాపూర్కు చెందిన వ్యాపారి మల్లాని పెంటేశ్ హత్య కేసును మియాపూర్ పోలీసులు ఛేదించారు. భార్య తన ప్రియుడితో కలిసి ఆస్తి కోసం భర్తను హత్య చేసి, మృతదేహాన్ని మహారాష్ట్రకు తరలించి పెట్రోల్ పోసి దహనం చేసినట్లు పోలీసులు వెల్లడించారు. ఈ కేసులో ముగ్గురు నిందితులను అరెస్ట్ చేశారు. మృతుడు మల్లాని పెంటేశ్ (57) మియాపూర్లో నివాసం ఉంటూ వ్యాపారం చేస్తున్నాడు. ఈ కేసులో మృతుడి భార్య మల్లాని సత్యవతి, ఆమెతో అక్రమ సంబంధం కొనసాగించినట్లు పోలీసులు పేర్కొన్న మార్రి మధుసూదన్ రెడ్డి, దిద్ది రాజేష్ కుమార్ లను పోలీసులు అదుపులోకి తీసుకున్నారు.
పోలీసుల వివరాల ప్రకారం, 2025 నవంబర్ 25న సత్యవతి తన భర్త నవంబర్ 19 ఉదయం నుంచి కనిపించడం లేదంటూ మియాపూర్ పోలీస్ స్టేషన్లో ఫిర్యాదు చేయడంతో మిస్సింగ్ కేసు నమోదు చేశారు. అయితే విస్తృతంగా దర్యాప్తు చేసినప్పటికీ ఆచూకీ లభించలేదు. అనంతరం ఉన్నతాధికారుల ఆదేశాల మేరకు కేసు మరింత లోతుగా విచారణకు వెళ్లింది. ఈ ఏడాది జూలై 8న ఉదయం ఒక వ్యక్తి నిందితురాలు సత్యవతిని పోలీస్ స్టేషన్కు తీసుకువచ్చి లిఖితపూర్వకంగా అదనపు న్యాయేతర ఒప్పుకోలు సమర్పించాడు. విచారణలో సత్యవతి తన పాత్రను అంగీకరించడంతో కేసును హత్య కేసుగా మార్చి భారతీయ న్యాయ సంహిత (BNS) సెక్షన్లు 103(1), 238, 231 రీడ్ విత్ 61 కింద నమోదు చేశారు. అనంతరం మిగతా ఇద్దరు నిందితులను కూడా అరెస్ట్ చేశారు. దర్యాప్తులో వెలుగులోకి వచ్చిన వివరాల ప్రకారం, సత్యవతి, మధుసూదన్ రెడ్డి మధ్య అక్రమ సంబంధం ఉందని, భర్త ఆస్తిని స్వాధీనం చేసుకుని స్వేచ్ఛగా జీవించాలనే ఉద్దేశంతో హత్యకు కుట్ర పన్నినట్లు పోలీసులు తెలిపారు.
పథకం ప్రకారం 2025 నవంబర్ 18న మధుసూదన్ రెడ్డి నిద్రమాత్రలు ఇచ్చాడు. వాటిని సత్యవతి తన భర్త భోజనంలో కలిపింది. అనంతరం మధుసూదన్ రెడ్డి, రాజేష్ కుమార్ ముందుగా సిద్ధం చేసిన ఎక్స్యూవీ–500 వాహనంలో ఇంటికి చేరుకుని ముగ్గురూ కలిసి పెంటేశ్ను ఊపిరాడకుండా చేసి హత్య చేసినట్లు పోలీసులు పేర్కొన్నారు. తర్వాత మృతదేహాన్ని మహారాష్ట్రలోని నల్దుర్గ్ పోలీస్ స్టేషన్ పరిధికి తరలించి, ముందుగానే తెచ్చుకున్న పెట్రోల్తో దహనం చేసినట్లు వెల్లడించారు. అనంతరం నవంబర్ 25న భర్త కనిపించడం లేదంటూ సత్యవతి పోలీసులకు ఫిర్యాదు చేసి దర్యాప్తును తప్పుదోవ పట్టించే ప్రయత్నం చేసినట్లు పోలీసులు తెలిపారు. దర్యాప్తు సందర్భంగా నల్దుర్గ్ పోలీస్ స్టేషన్ను సంప్రదించగా, 2025 నవంబర్ 19న తమ పరిధిలో సెమీ-బర్న్ట్ స్థితిలో గుర్తుతెలియని మృతదేహం లభించినట్లు నిర్ధారించారు. ఆ కేసులో భద్రపరిచిన ఫీమర్ ఎముకను డీఎన్ఏ పరీక్షల కోసం సంరక్షించినట్లు సమాచారం. సంబంధిత కేసు పత్రాలను కూడా పోలీసులు సేకరించారు.
నిందితుల వద్ద నుంచి రెండు మొబైల్ ఫోన్లు, నాలుగు తులాల బంగారు గొలుసు, రూ.2 లక్షల నగదు, ఒక మొబైల్ ఫోన్, అలాగే మృతదేహాన్ని తరలించేందుకు ఉపయోగించిన టీఎస్ 09 ఈటీ 3014 నంబరు గల ఎక్స్యూవీ–500 కారును స్వాధీనం చేసుకున్నారు. కేసును ఛేదించిన మియాపూర్ పోలీస్ స్టేషన్ సిబ్బందిని, అదనపు డీసీపీ, ఏసీపీ పర్యవేక్షణలో పనిచేసిన దర్యాప్తు బృందాన్ని కూకట్పల్లి జోన్ డీసీపీ అభినందించారు.
