శేరిలింగంపల్లి, జూన్15 (నమస్తే శేరిలింగంపల్లి): వర్షాకాలంలో నీటి నిల్వ సమస్యలను నివారించేందుకు సైబరాబాద్ మున్సిపల్ కార్పొరేషన్ (సీఎంసీ) మాధాపూర్ (సర్కిల్-50), శేరిలింగంపల్లి (సర్కిల్-49) పరిధిలోని కీలక వాటర్లాగింగ్ ప్రాంతాల్లో ప్రత్యేక చర్యలు చేపట్టింది. కమిషనర్ సృజన ఆదేశాల మేరకు ఇంజినీరింగ్, శానిటేషన్, క్షేత్రస్థాయి బృందాలు సమన్వయంతో పనిచేస్తూ స్టార్మ్ వాటర్ డ్రెయిన్ల శుభ్రత, నాలాల డిసిల్టింగ్, అడ్డంకుల తొలగింపు, నీటి పారుదల సామర్థ్య పెంపుపై దృష్టి సారించాయి. దుర్గం చెరువు సమీపంలోని విఠల్రావు నగర్ వద్ద బాక్స్ డ్రెయిన్ ప్రవేశద్వారం వద్ద పేరుకుపోయిన ప్లాస్టిక్ వ్యర్థాలు, చెత్తను తొలగించి నీటి ప్రవాహాన్ని మెరుగుపరిచారు. డ్రెయిన్ ప్రవేశద్వారాన్ని విస్తరించడం ద్వారా సమస్యకు శాశ్వత పరిష్కారం దిశగా చర్యలు చేపట్టారు.
లెదర్ ఇన్స్టిట్యూట్ సమీపంలోని మల్కం చెరువు వద్ద స్టార్మ్ వాటర్ డ్రెయిన్లు, క్రాస్ డ్రెయిన్లలో పేరుకుపోయిన మట్టిని యంత్రాల సహాయంతో తొలగించి చెరువులోకి వర్షపు నీటి ప్రవాహాన్ని సాఫీగా మార్చారు. గచ్చిబౌలిలోని ప్రెస్టన్ ప్రైమ్ మాల్ సమీపంలో డ్రెయిన్ గ్రేటింగ్లు మూసుకుపోవడం, ఖాజాగూడ చెరువుకు వెళ్లే అవుట్ఫాల్ మార్గం అడ్డంకులకు గురికావడంతో ఏర్పడుతున్న నీటి నిల్వ సమస్యను పరిష్కరించేందుకు డ్రెయిన్లను శుభ్రపరచి నాలాను అసలు సామర్థ్యానికి పునరుద్ధరించారు. సైబర్ టవర్స్–యశోద ఆసుపత్రి రహదారిలోని స్మైలైన్ డెంటల్ ఆసుపత్రి సమీపంలో కల్వర్ట్ వెంటిలేషన్ ఓపెనింగ్లను విస్తరించి వర్షపు నీటి పారుదల సామర్థ్యాన్ని పెంచారు. ఇజ్జత్నగర్లోని జూబ్లీ గార్డెన్ ప్రాంతంలో నాలా వెడల్పు తగ్గిపోవడం, మట్టి పేరుకుపోవడం, అవుట్లెట్ పరిమితులు వంటి సమస్యలను గుర్తించి విస్తృత స్థాయిలో డిసిల్టింగ్ చేపట్టారు. భవిష్యత్తులో శాశ్వత పరిష్కారం కోసం ప్రత్యేక స్టార్మ్ వాటర్ డ్రెయిన్ నిర్మాణానికి ప్రతిపాదనలు సిద్ధం చేశారు.
ఖాజాగూడలోని స్టేట్ ఎలక్షన్ కమిషన్ భవనం సమీపంలో స్టార్మ్ వాటర్ ప్రవాహానికి అడ్డంకిగా ఉన్న డైవర్షన్ పైప్లైన్ను తొలగించి నాలాను పునరుద్ధరించారు. కొండాపూర్లోని సంతోష్ ధాబా సమీపంలో స్టార్మ్ వాటర్ డ్రెయిన్ ఇన్లెట్లు మూసుకుపోవడం, దిగువ భాగంలో బాటిల్నెక్ సమస్య కారణంగా ఏర్పడుతున్న నీటి నిల్వలను నివారించేందుకు డ్రెయిన్లను శుభ్రపరిచారు. శాశ్వత పరిష్కారం కోసం హైడ్రాతో సమన్వయం కొనసాగుతోంది. మల్కం చెరువు పరిసర ప్రాంతాల్లో వర్షపు నీటి ప్రవాహానికి అడ్డంకిగా ఉన్న పాయింట్లను తొలగించి చెరువులోకి నీరు సాఫీగా చేరేలా చర్యలు చేపట్టారు. సీఎంసీ కమిషనర్ మాట్లాడుతూ హైడ్రా, ట్రాఫిక్ పోలీసులు తదితర శాఖలతో సమన్వయం చేసుకుంటూ అన్ని సున్నిత ప్రాంతాలను నిరంతరం పర్యవేక్షిస్తున్నామని తెలిపారు. నాలాల డిసిల్టింగ్, స్టార్మ్ వాటర్ డ్రెయిన్ల నిర్వహణ, ఇన్లెట్ల శుభ్రత, క్షేత్రస్థాయి తనిఖీలు నిరంతరంగా కొనసాగుతున్నాయని పేర్కొన్నారు.
నీటి నిల్వలకు సంబంధించిన ఫిర్యాదులపై తక్షణ స్పందన ఇవ్వాలని అధికారులను ఆదేశించిన కమిషనర్, అవసరమైన యంత్రాలు, సిబ్బంది, ప్రత్యేక బృందాలను కీలక ప్రాంతాల్లో సిద్ధంగా ఉంచినట్లు తెలిపారు. వర్షాకాలంలో ప్రజలకు ఇబ్బందులు కలగకుండా సమర్థవంతమైన వర్షపు నీటి పారుదల వ్యవస్థను నిర్వహించేందుకు సైబరాబాద్ మున్సిపల్ కార్పొరేషన్ కట్టుబడి ఉందని స్పష్టం చేశారు.
