శేరిలింగంప‌ల్లి, అక్టోబ‌ర్ 13 (న‌మ‌స్తే శేరిలింగంప‌ల్లి): ఆల్విన్ కాలనీ సర్కిల్ పరిధిలో కొనసాగుతున్న అభివృద్ధి, పౌర మౌలిక వసతుల పనులను సైబరాబాద్ మున్సిపల్ కార్పొరేషన్ (CMC) కమిషనర్ సృజ‌న ఉదయం క్షేత్రస్థాయిలో పరిశీలించారు. కూకట్‌పల్లి జోన్ పరిధిలో నిర్వహించిన ఈ పర్యటనలో వివిధ అభివృద్ధి పనుల పురోగతిని సమీక్షించి, అధికారులకు పలు సూచనలు చేశారు. శంషీగూడ, ఆల్విన్ కాలనీ, భాగ్యనగర్ కాలనీ, వివేకానంద నగర్ తదితర ప్రాంతాల్లో కొనసాగుతున్న స్టార్మ్ వాటర్ డ్రెయిన్ల నిర్మాణం, కాంపౌండ్ వాల్స్ ఏర్పాటు, శ్మశానవాటికలు, పార్కుల అభివృద్ధి, సీసీ రోడ్ల నిర్మాణ పనులను కమిషనర్ పరిశీలించారు. పనుల పురోగతి, అమలు తీరును సమీక్షించడంతో పాటు క్షేత్రస్థాయిలో ఎదురవుతున్న సమస్యలు, స్థానిక అవసరాలపై సిబ్బందితో చర్చించారు.
అభివృద్ధి పనులను నిర్ణీత గడువులోగా పూర్తి చేయాలని, పనుల నాణ్యతలో రాజీ పడకూడదని కమిషనర్ సంబంధిత అధికారులను ఆదేశించారు. పనుల పురోగతిని నిరంతరం పర్యవేక్షించేందుకు క్రమం తప్పకుండా క్షేత్రస్థాయి తనిఖీలు నిర్వహించాలని సూచించారు. పనుల్లో జాప్యం జరగకుండా అవసరమైన చర్యలు చేపట్టి, ప్రజలకు మెరుగైన పౌర మౌలిక వసతులు అందేలా చూడాలని స్పష్టం చేశారు. ఈ పర్యటనలో జోనల్ కమిషనర్, సూపరింటెండింగ్ ఇంజినీర్ (ఎస్‌ఈ), అసిస్టెంట్ సిటీ ప్లానర్ (ఏసీపీ), డిప్యూటీ ఇంజినీర్లు (మెయింటెనెన్స్, ఎస్‌డబ్ల్యూఎం), అన్ని వార్డుల అసిస్టెంట్ ఇంజినీర్లు (ఏఈలు) పాల్గొన్నారు.
