శేరిలింగంపల్లి, జూన్ 1 (నమస్తే శేరిలింగంపల్లి): సైబరాబాద్ మున్సిపల్ కార్పొరేషన్ (సీఎంసీ) చేపట్టిన రోజుకు ఒక వార్డు కార్యక్రమంలో భాగంగా కమిషనర్ సృజన జగద్గిరిగుట్ట వార్డులో క్షేత్రస్థాయి పర్యటన నిర్వహించారు. కుత్బుల్లాపూర్ జోన్ పరిధిలోని చింతల్ సర్కిల్లో ఉన్న జగద్గిరిగుట్ట వార్డును సందర్శించిన కమిషనర్, జోనల్ కమిషనర్, డిప్యూటీ కమిషనర్ తదితర అధికారులతో కలిసి స్థానిక సమస్యలను పరిశీలించారు. ఈ సందర్భంగా స్థానిక నివాసితులు, ఆర్డబ్ల్యూఏ ప్రతినిధులు, సంఘ నాయకులతో సమావేశమైన కమిషనర్ ప్రజలు ఎదుర్కొంటున్న సమస్యలను నేరుగా తెలుసుకున్నారు. వార్డులోని పారిశుధ్యం, రహదారులు, డ్రైనేజీ, తాగునీరు, పార్కులు, ట్రాఫిక్ నిర్వహణ తదితర అంశాలపై పౌరులు తమ సమస్యలను వివరించారు.
హెచ్ఎంటీ కాలనీలో దోమల నివారణ చర్యలను బలోపేతం చేయాలని, పైప్లైన్ రోడ్డుపై అనధికారికంగా చెత్త వేయడాన్ని అరికట్టాలని స్థానికులు కోరారు. అలాగే చెత్త సేకరణ వ్యవస్థను మెరుగుపరచడం, ఆలయాల వద్ద పేరుకుపోయిన చెత్తను తొలగించడం, ప్రజల్లో అవగాహన కార్యక్రమాలు నిర్వహించాలని విజ్ఞప్తి చేశారు. వాంబే కాలనీ, రాజీవ్ గృహకల్ప, రాజీవ్ గాంధీ నగర్, సోమయ్య నగర్, జగద్గిరిగుట్ట ప్రాంతాల్లో అంతర్గత రహదారుల మరమ్మతులు, అభివృద్ధి చేపట్టాలని ప్రజలు కోరగా, బీరప్ప నగర్లో ఫుట్పాత్ నిర్మాణం, జగద్గిరిగుట్టలో బాక్స్ కల్వర్ట్ నిర్మాణం, పైప్లైన్ రోడ్డుకు మెరుగైన అనుసంధానం కల్పించాలని విజ్ఞప్తి చేశారు. డ్రైనేజీ సమస్యలు, నీటి నిల్వలు, తాగునీటి కొరత అంశాలు కూడా ప్రధానంగా ప్రస్తావనకు వచ్చాయి. వాంబే కాలనీలో ఓవర్హెడ్ స్టోరేజ్ ట్యాంక్, పబ్లిక్ ట్యాప్స్ ఏర్పాటు చేయాలని స్థానికులు కోరారు.
బతుకమ్మ కుంట అభివృద్ధి, పార్కుల ఏర్పాటు, ఓపెన్ జిమ్లు, కమ్యూనిటీ హాల్ నిర్మాణం, వీధి దీపాల సమస్యల పరిష్కారం, పార్కింగ్ సమస్యలు, ఆక్రమణల తొలగింపు, రహదారి భద్రత మెరుగుదల వంటి అంశాలను కూడా ప్రజలు కమిషనర్ దృష్టికి తీసుకువచ్చారు. పర్యటనలో వచ్చిన అన్ని సమస్యలను సంబంధిత శాఖలు సమన్వయంతో పరిశీలించి, ప్రాధాన్యత ఆధారంగా పరిష్కరించాలని కమిషనర్ అధికారులను ఆదేశించారు. నిర్ణీత కాలపరిమితిలో చర్యలు పూర్తి చేసి పురోగతి నివేదికలు సమర్పించాలని సూచించారు. ప్రజల సమస్యలను నేరుగా తెలుసుకుని క్షేత్రస్థాయిలోనే పరిష్కార చర్యలు చేపట్టడమే రోజుకు ఒక వార్డు కార్యక్రమం ప్రధాన ఉద్దేశమని అధికారులు తెలిపారు.
