నమస్తే శేరిలింగంపల్లి: వైకుంఠ ఏకాదశి(ముక్కోటి ఏకాదశి) పర్వదినాన్ని పురస్కరించుకుని శేరిలింగంపల్లి నియోజకవర్గం పరిధిలోని దేవాలయాలు కిటకిటలాడాయి. ఉత్తరద్వార దర్శనం చేసుకునేందుకు దేవాలయాల్లో భక్తులు పెద్ద ఎత్తున బారులు తీరారు. వేడుకల్లో భాగంగా భక్తుల కోసం ఆయా దేవాలయాల కమిటీ సభ్యులు ప్రత్యేక ఏర్పాట్లు చేశారు. ఆలయాలను సర్వాంగ సుందరంగా ముస్తాబు చేశారు. నియోజకవర్గానికి చెందిన పలువురు రాజకీయ ప్రముఖులు భక్తులు వేడుకల్లో పాల్గొని స్వామివారిని దర్శించుకున్నారు.
వెంకటేశ్వర స్వామికి ప్రభుత్వ విప్ గాంధీ ప్రత్యేక పూజలు..
వైకుంఠ ఏకాదశి పర్వదినాన్ని పురస్కరించుకుని హైదర్ నగర్ డివిజన్ పరిధిలోని నిజాంపేట్ రోడ్డు లోని సెవెన్ హిల్స్ లో గల శ్రీ వెంకటేశ్వర స్వామి వారి దేవస్థానంలో ప్రభుత్వ గాంధీ కుటుంబ సమేతంగా ప్రత్యేక పూజలు చేశారు. గాంధీ సతీమణి శ్యామల దేవి, కోడలు భార్గవి, మనవడు అద్వైత్ గాంధీలతో కలిసి వెంకటేశ్వర స్వామి వారిని ఉత్తరద్వార దర్శనం చేసుకున్నారు. ఈ కార్యక్రమంలో ఈఓ అరుణ కుమారి, ఆలయ కమిటీ ప్రతినిధులు కేఆర్కే రాజు, శ్రీహరి , కిరణ్, కుమార స్వామి, అప్పిరెడ్డి , శ్రీలక్ష్మి, బాబు తెరాస నాయకులు సాగర్ , కుమార్, పద్మ తదితరులు పాల్గొన్నారు.
చందానగర్ వెంకటేశ్వర స్వామి దేవాలయంలో…
విశాఖ శ్రీ శారదా పీఠ పాలిత శ్రీ వేంకటేశ్వర స్వామి దేవాలయ సముదాయంలో వైకుంఠ ఏకాదశి ఉత్సవాలు ఘనంగా జరిగాయి. స్వామి వారికి ఉదయం 1.00 గంటలకు సుప్రభాతసేవ 1.30 ని.ల నుండి విష్వక్షేన పూజ 2.00 గం.లకు పుణ్యవాహచనం 2.30 గం.లకు విశేష పంచామృత అభిషేకం, విశేష పుష్ప అలంకారం 5.00 గం లకు గరుడ వాహనసేవ 6.00 గం లకు భక్తులకు వైకుంఠ ద్వార దర్శనం 7.00 గం ల నుండి 1.00 గం లవరకు విశేష అర్చనలు హారతి తీర్ధ ప్రసాధములు తదితర కార్యక్రమాలు నిర్వహించారు. ఈ వేడుకలకు చందానగర్ డివిజన్ కార్పొరేటర్ మంజుల రఘునాథ్ రెడ్డి దంపతులు, మాదాపూర్ డివిజన్ కార్పొరేటర్ జగదీశ్వర్ గౌడ్ లు హాజరై స్వామివారిని దర్శించుకున్నారు. దాదాపు 15000 మంది భక్తులు ఉత్తర ద్వారం నుండి స్వామి వారిని దర్శనం చేసుకొన్నట్లు ఆలయ కమిటీ సభ్యులు తెలిపారు. వేడుకల్లో టిఆర్ఎస్ నాయకులు సుప్రజా ప్రవీణ్, రవీందర్ రెడ్డి తదితరులు పాల్గొన్నారు.
మియాపూర్ బికే ఎంక్లేవ్ లో…
ముక్కోటి ఏకాదశి సందర్భంగా బి కె ఎనక్లేవ్ లోని వెంకటేశ్వర స్వామి దేవాలయంలో నిర్వహించిన వేడుకలకు మియాపూర్ డివిజన్ కార్పొరేటర్ ఉప్పలపాటి శ్రీకాంత్ హాజరై స్వామివారిని ఉత్తర ద్వార దర్శనం చేసుకున్నారు. ఈ వేడుకల్లో ప్రతాప్ రెడ్డి, జములయ్య, కృష్ణ గౌడ్, సాయి క్రిష్ణ, కాలనీ వాసులు పాల్గొన్నారు
మియాపూర్ ధర్మపురి క్షేత్రంలో…
మియాపూర్ లోని శ్రీ ధర్మపురి క్షేత్రం లో వైకుంఠ ఏకాదశి ఉత్సవాలు అంగరంగ వైభవంగా జరిగాయి. ఈ వేడుకల్లో మాదాపూర్ డివిజన్ కార్పొరేటర్ జగదీశ్వర్ గౌడ్, పరిసర ప్రాంతాలకు చెందిన భక్తులు పెద్దఎత్తున హాజరై ఉత్తర ద్వార దర్శనం చేసుకున్నారు.
శిల్ప ఎంక్లేవ్ లో…
చందానగర్ శిల్ప ఎంక్లేవ్ లోని విశాఖ శ్రీ శారదా పీఠ పరిపాలిత శ్రీ లక్ష్మీ గణపతి దేవాలయంలో ముక్కోటి ఏకాదశి వేడుకలు ఘనంగా జరిగాయి వేడుకల్లో భాగంగా ఉదయం 5 గంటల నుండి ఉత్తరద్వార దర్శనం, శ్రీ సీతారామ సహిత కార్యసిద్ధి ఆంజనేయస్వామికి పంచామృత అభిషేకం, 6 గంటలనుండి విశేషపూజలు అర్చనలు, అభిషేకములు తదితర కార్యక్రమాలు నిర్వహించారు.
అన్నపూర్ణ ఎంక్లేవ్ లో…
అన్నపూర్ణ ఎంక్లేవ్ లోని షిర్డీ సాయిబాబా దేవాలయంలో ముక్కోటి ఏకాదశి సందర్భంగా ఉదయం 5 గంటల నుండి ఉత్తర ద్వార దర్శనం, ప్రత్యేక అర్చనలు నిర్వహించారు. భక్తులు పెద్ద ఎత్తున హాజరై స్వామివారిని దర్శించుకున్నారు.
