శేరిలింగంప‌ల్లి, సెప్టెంబ‌ర్ 25 (న‌మ‌స్తే శేరిలింగంప‌ల్లి): గ్రేటర్ హైదరాబాద్ నగరాభివృద్ధి లక్ష్యాలను పురస్కరించుకుని, మధ్యప్రదేశ్ రాష్ట్రంలోని ఇండోర్ నగరానికి వెళ్లిన గ్రేటర్ హైదరాబాద్ కార్పొరేటర్లు, నగర మేయర్ గద్వాల్ విజయలక్ష్మితో కలిసి గచ్చిబౌలి డివిజన్ కార్పొరేటర్ గంగాధర్ రెడ్డి ఇండోర్ మేయర్ పుష్యమిత్ర భార్గవ్, ఇండోర్ మునిసిపల్ కమిషనర్ శివమ్ వర్మ, అదనపు కమిషనర్ అభిలాష్ మిశ్రా, ఇతర ఉన్నతాధికారులతో సమావేశం అయ్యారు. ఈ సమావేశంలో ఇండోర్ నగరంలో అమలు అవుతున్న అభివృద్ధి పనులు, మౌలిక వసతులు, పారిశుద్ధ్యం నిర్వహణ, పట్టణాభివృద్ధి అంశాలను ప్రాథమికంగా పరిశీలించారు.
కార్పొరేటర్ గంగాధర్ రెడ్డి మాట్లాడుతూ ఇండోర్ లో అమలవుతున్న అభివృద్ధి విధానాలను పరిశీలించి, వాటిని గ్రేటర్ హైదరాబాద్ నగరంలో అమలు చేయడానికి ప్రతిపాదనలు సిద్ధం చేయనున్నాం అని అన్నారు. ప్రత్యేకంగా పట్టణాభివృద్ధి, పరిశుభ్రత, రహదారి నిర్వహణలో ఇండోర్ నగరం చూపిన విజయం చాలా అవసరం అని తెలిపారు. అంతేకాకుండా ఇండోర్ లో వినియోగిస్తున్న పర్యావరణ స్నేహపూర్వక పద్ధతులు, ప్రభుత్వ కార్యక్రమాలను గమనించి వాటిని ప్రోత్సహించడం ద్వారా ప్రజల జీవన ప్రమాణాలను మెరుగుపరచడం ముఖ్యమని తాను భావిస్తున్నాన‌ని స్పష్టం చేశారు. ఈ విధానాలు పరిశుభ్రత, పునరుత్పత్తి చేయగల శక్తి వనరులు, కార్బన్ ఉద్గారాలను తగ్గించడం, ప‌చ్చదనంతో కూడిన ప్రదేశాలను అభివృద్ధి చేయడం వంటి అంశాలకు ప్రాధాన్యత ఇస్తాయి, ఇవి పర్యావరణానికి, సమాజానికి ఎంతో ఉపయోగకరంగా ఉంటాయి అన్నారు.
ఘన వ్యర్థాల నిర్వహణ, నీటి నిర్వహణ, సాంస్కృతిక, వారసత్వ పరిరక్షణ, ఇతర పౌర సేవలు, పర్యావరణ పరిరక్షణ కార్యక్రమాలు ప్రాధాన్యంగా చేపట్టబడతాయ‌ని అన్నారు. ఈ కార్యక్రమాలలో ఆరోగ్యం, పరిశుభ్రతను మెరుగుపరచడంలో ప్రజల భాగస్వామ్యం చాలా అవసరం అని ఆయన చేర్చారు. ఈ కార్యక్రమంలో ఇండోర్ మునిసిపల్ అధికారులు, గ్రేటర్ హైదరాబాద్ కార్పొరేటర్లు తదితరులు పాల్గొన్నారు
