నమస్తే శేరిలింగంపల్లి: టిప్పర్ ఢీకొట్టడంతో ద్విచక్ర వాహనదారుడు మృతి చెందిన సంఘటన గచ్చిబౌలి పోలీస్ స్టేషన్ పరిధిలో మంగళవారం చోటు చేసుకుంది. గచ్చిబౌలి పోలీసులు తెలిపిన వివరాల ప్రకారం సనత్ నగర్ కు చెందిన ఆకాశపు శ్రీనివాస్ బేగంపేట వద్ద గల వికొల్లాబ్ సాప్ట్ వేర్ కంపెనీలో సాప్ట్ వేర్ ఉద్యోగం చేస్తున్నాడు. మంగళవారం మధ్యాహ్నం 2 గంటలకు విధులు ముగించుకున్న శ్రీనివాస్ ఏపీ 07 సీఎల్ 9899 నంబర్ గల పల్సర్ బైక్ పై రంగారెడ్డి జిల్లా శంకర్ పల్లి మండలం మోఖిల్లా గ్రామంలోని తన స్నేహితుడు గుర్రాల ఉదయ్ భాస్కర్ ను కలవడానికి బయల్దేరాడు. వట్టినాగులపల్లి అవుటర్ రింగ్ రోడ్డు సర్వీస్ రోడ్డులోని గర్ ఇన్ఫోబాన్ సమీపంలోకి రాగానే ఎదురుగా వస్తున్న టీఎస్ 30 టీ 0590 నంబర్ గల టిప్పర్ ద్విచక్ర వాహనాన్ని ఢీకొట్టడంతో శ్రీనివాస్ తీవ్రగాయాలపాలై అక్కడికక్కడే మృతిచెందాడు. కేసు నమోదు చేసుకుని దర్యాప్తు చేస్తున్నట్లు పోలీసులు తెలిపారు.
