శేరిలింగంపల్లి, అక్టోబర్ 24 (న‌మ‌స్తే శేరిలింగంపల్లి): సైబరాబాద్ మున్సిపల్ కార్పొరేషన్ (CMC) పరిధిలోని అన్ని విభాగాల పనితీరుపై కమిషనర్ సృజ‌న సమగ్ర సమీక్ష నిర్వహించారు. పెండింగ్ ఫిర్యాదుల పరిష్కారం, అభివృద్ధి పనుల పురోగతి, ప్రజలకు మెరుగైన పౌర సేవల అందజేతపై ప్రత్యేక దృష్టి సారించాలని అధికారులను ఆదేశించారు. మంజూరైన పనులను నాణ్యతా ప్రమాణాలతో నిర్ణీత గడువులోగా పూర్తి చేయాలని స్పష్టం చేశారు. అదనపు కమిషనర్లు, జోనల్ కమిషనర్లు, చీఫ్ ఇంజినీర్, చీఫ్ సిటీ ప్లానర్ (CCP), విజిలెన్స్ అధికారులు, డిప్యూటీ కమిషనర్లు, వివిధ విభాగాల అధిపతులు, సంబంధిత శాఖల అధికారులతో నిర్వహించిన ఈ సమావేశంలో పెండింగ్ సమస్యలు, కొనసాగుతున్న అభివృద్ధి పనులు, ప్రతిపాదిత ప్రాజెక్టులు, పరిపాలనా అంశాలపై సమీక్షించారు.
టౌన్ ప్లానింగ్ విభాగంలో పెండింగ్ ఫిర్యాదులు, బిల్డ్ నౌ (Build Now) దరఖాస్తులు, భూసేకరణ, వాక్-ఫ్రీ కార్యక్రమం, పెండింగ్ కోర్టు కేసుల స్థితిగతులను సమీక్షించారు. దరఖాస్తులు, ఫిర్యాదులను వేగంగా పరిష్కరించాలని, కోర్టు కేసుల విషయంలో సంబంధిత అధికారులు, స్టాండింగ్ కౌన్సిల్‌తో సమన్వయం చేసుకోవాలని సూచించారు. ఇంజినీరింగ్ విభాగం పరిధిలో మంజూరైన, ప్రతిపాదిత పనులు, పార్కుల అభివృద్ధి, జంక్షన్ల ఆధునీకరణ, ఫుట్‌పాత్‌లు, ప్రజా సౌకర్యాలు, వీధి దీపాల పనుల పురోగతిని పరిశీలించారు. పనులపై నిరంతర పర్యవేక్షణ చేపట్టడంతోపాటు నాణ్యతా ప్రమాణాలు పాటిస్తూ గడువులోగా పూర్తి చేయాలని ఆదేశించారు.
పట్టణ సమాజ అభివృద్ధి విభాగం (UCD) పరిధిలో కొత్త స్వయం సహాయక సంఘాల ఏర్పాటు, బ్యాంకు రుణ అనుసంధానం, పీఎం స్వనిధి (PM SVANidhi) పథకం అమలు, జీవనోపాధి కార్యక్రమాల పురోగతిని సమీక్షించారు. అర్హులైన లబ్ధిదారులకు పథకాల ప్రయోజనాలు అందేలా చర్యలు తీసుకోవాల్సిన అంశాలపై చర్చించారు. ఘన వ్యర్థాల నిర్వహణ విభాగం (SWM) పరిధిలో పారిశుధ్య కార్మికులు, వాహనాల హాజరు, నో బిన్–నో ట్రేడ్ కార్యక్రమం, పోస్టర్ రహిత నగర ప్రచారం, నిర్మాణ–కూల్చివేత వ్యర్థాల నిర్వహణ, ప్రత్యేక పారిశుధ్య కార్యక్రమాలు, స్వచ్ఛ సర్వేక్షణ్ కార్యకలాపాలను సమీక్షించారు. దోమల ద్వారా వ్యాపించే వ్యాధుల నియంత్రణ, ప్రజారోగ్య కార్యక్రమాల అమలును ఆరోగ్య విభాగం ద్వారా సమీక్షించి, వ్యాధుల నివారణకు అవసరమైన చర్యలను మరింత పటిష్టంగా అమలు చేయాలని సూచించారు.
పట్టణ జీవవైవిధ్య అభివృద్ధి కార్యక్రమాలు, మున్సిపల్ ఆస్తుల సమర్థవంతమైన నిర్వహణ, వాటి పరిరక్షణకు సంబంధించిన అంశాలను సమీక్షించారు. పట్టణ పర్యావరణ పరిరక్షణతోపాటు మున్సిపల్ ఆస్తులను సమర్థవంతంగా వినియోగించుకునేలా చర్యలు చేపట్టాలని సూచించారు. రవాణా విభాగంలో వాహనాల కొనుగోలు ప్రక్రియ, నీటిలో పెరిగే కలుపు మొక్కల తొలగింపు పనులపై సమీక్ష నిర్వహించారు. ప్రకటనల నిర్వహణ, ఐటీ సంబంధిత సమస్యలు, జనగణన కార్యకలాపాలపైనా చర్చించారు. ఆయా విభాగాల్లో పెండింగ్ అంశాలను పరిష్కరించి, ప్రణాళికాబద్ధమైన కార్యక్రమాలను సమర్థవంతంగా అమలు చేయాలని అధికారులకు సూచించారు. ప్రతి విభాగాధిపతి తమ శాఖ పరిధిలోని పనులపై క్రమం తప్పకుండా సమీక్షలు నిర్వహించాలని, పెండింగ్ సమస్యల పరిష్కారానికి ప్రాధాన్యం ఇవ్వాలని కమిషనర్ స్పష్టం చేశారు. వివిధ విభాగాల మధ్య సమన్వయాన్ని పెంపొందించి, మంజూరైన అభివృద్ధి పనులు, ప్రణాళికాబద్ధమైన కార్యక్రమాలను నిర్ణీత గడువులోగా పూర్తి చేయాలని ఆదేశించారు.
ప్రజలకు మెరుగైన పౌర సౌకర్యాలు అందించడం, పనులపై సమర్థవంతమైన పర్యవేక్షణ, అధికారుల జవాబుదారీతనం, నాణ్యమైన సేవల పంపిణీ ద్వారా సైబరాబాద్ మున్సిపల్ కార్పొరేషన్ పరిధిలో పరిపాలనను మరింత సమర్థవంతంగా తీర్చిదిద్దాలని కమిషనర్ సూచించారు.
