శేరిలింగంపల్లి, సెప్టెంబర్ 5 (నమస్తే శేరిలింగంపల్లి): కాంగ్రెస్ ప్రభుత్వం ఎన్నికల సమయంలో ఇచ్చిన హామీలను అమలు చేయడంలో విఫలమైందని ఆరోపిస్తూ బీఆర్ఎస్ (BRS) ఆధ్వర్యంలో చందానగర్లో భారీ నిరసన కార్యక్రమం నిర్వహించారు. పార్టీ వర్కింగ్ ప్రెసిడెంట్ కేటీఆర్ ఆదేశాల మేరకు, కృష్ణారావు, శంబీపూర్ రాజు సూచనలతో బొబ్బా నవతా రెడ్డి ఆధ్వర్యంలో ఈ కార్యక్రమం చేపట్టారు. మాజీ కార్పొరేటర్లు సాయిబాబా, రంగారావు, కోమండ్ల శ్రీనివాస్ రెడ్డి, మల్లికార్జున్ శర్మ, శ్రీకాంత్తో పాటు పార్టీ నాయకులు, కార్యకర్తలు, ఉద్యమకారులు, మహిళలు పెద్ద సంఖ్యలో పాల్గొన్నారు.
కాంగ్రెస్ పార్టీ అధికారంలోకి వచ్చిన 100 రోజుల్లో 420 హామీలను అమలు చేస్తామని చెప్పి, వెయ్యి రోజులు గడిచినా ప్రజలను మోసం చేస్తోందని బీఆర్ఎస్ నాయకులు విమర్శించారు. గత ప్రభుత్వం దళితులకు రూ.10 లక్షల దళితబంధు పథకం అందిస్తే, తాము అధికారంలోకి వస్తే రూ.12 లక్షలు ఇస్తామని కాంగ్రెస్ హామీ ఇచ్చిందని గుర్తుచేశారు. అయితే ఆ హామీని ఇప్పటికీ అమలు చేయలేదని ఆరోపించారు. వృద్ధులకు నెలకు రూ.4,000, దివ్యాంగులకు రూ.6,000 పెన్షన్ ఇస్తామని ఇచ్చిన హామీలు అమలు కాలేదని బీఆర్ఎస్ నాయకులు పేర్కొన్నారు. మహిళలకు ప్రతి నెలా రూ.2,500 ఆర్థిక సాయం అందిస్తామని చెప్పినా ఆ హామీ కూడా నెరవేరలేదన్నారు. రైతులకు ఎలాంటి షరతులు లేకుండా రూ.2 లక్షల రుణమాఫీ చేస్తామని చెప్పి, అధికారంలోకి వచ్చిన తర్వాత అనేక ఆంక్షలు విధించారని విమర్శించారు. రైతు భరోసా కింద ఎకరాకు ఏటా రూ.15 వేల పెట్టుబడి సాయం అందిస్తామని ఇచ్చిన హామీ కూడా పూర్తిస్థాయిలో అమలు కాలేదని ఆరోపించారు.
నిరుద్యోగ యువతకు నెలవారీ భృతి, విద్యార్థినులకు ఉచిత ఎలక్ట్రిక్ స్కూటీలు ఇస్తామని చెప్పి ఆ హామీలను విస్మరించారని బీఆర్ఎస్ నాయకులు మండిపడ్డారు. ఆడబిడ్డల వివాహాలకు రూ.లక్ష నగదుతో పాటు తులం బంగారం ఇస్తామని చెప్పి అమలు చేయలేదన్నారు. కల్యాణ లక్ష్మి, షాదీ ముబారక్ పథకాల విషయంలోనూ ప్రభుత్వం నిర్లక్ష్యంగా వ్యవహరిస్తోందని ఆరోపించారు. ప్రజలకు ఇచ్చిన హామీలను అమలు చేసే వరకు, ప్రజల హక్కుల కోసం శేరిలింగంపల్లి బీఆర్ఎస్ పార్టీ నిరంతరం పోరాటం కొనసాగిస్తుందని బొబ్బా నవతా రెడ్డి స్పష్టం చేశారు. కార్యక్రమంలో నియోజకవర్గానికి చెందిన బీఆర్ఎస్ నాయకులు, కార్యకర్తలు, ఉద్యమకారులు, మహిళలు పెద్ద సంఖ్యలో పాల్గొన్నారు.
