శేరిలింగంప‌ల్లి, అక్టోబ‌ర్ 26 (న‌మ‌స్తే శేరిలింగంప‌ల్లి): సైబరాబాద్ మున్సిపల్ కార్పొరేషన్ (సీఎంసీ) ఆధ్వర్యంలో సోమవారం నిర్వహించిన ప్రజావాణి కార్యక్రమానికి ప్రజల నుంచి మొత్తం 55 ఫిర్యాదులు అందాయి. వివిధ విభాగాలకు సంబంధించి పౌరులు తమ సమస్యలను అధికారుల దృష్టికి తీసుకువచ్చారు. వీటిలో అత్యధికంగా టౌన్ ప్లానింగ్ విభాగానికి 42 ఫిర్యాదులు అందడం గమనార్హం. విభాగాల వారీగా ఫిర్యాదుల వివరాలు ఇలా ఉన్నాయి. టౌన్ ప్లానింగ్ – 42, ఇంజినీరింగ్ – 5, రెవెన్యూ (ప్రాపర్టీ ట్యాక్స్) – 2, పారిశుధ్య విభాగం – 2, వెటర్నరీ విభాగం – 1, భూసేకరణ విభాగం – 1, అర్బన్ బయోడైవర్సిటీ – 1, అర్బన్ కమ్యూనిటీ డెవలప్‌మెంట్ – 1 ఫిర్యాదు అందాయి.
ప్రజావాణిలో స్వీకరించిన ప్రతి ఫిర్యాదును ప్రత్యేక ఐడీతో నమోదు చేసినట్లు సీఎంసీ వెల్లడించింది. ఫిర్యాదుల పరిష్కార పురోగతిని తెలుసుకునేందుకు ట్రాకింగ్ లింకులను కూడా అందుబాటులో ఉంచినట్లు తెలిపింది. దీనివల్ల ప్రజలు తమ ఫిర్యాదుల స్థితిగతులను ఎప్పటికప్పుడు తెలుసుకునే అవకాశం ఉంటుంది. ఫిర్యాదులను క్షుణ్ణంగా పరిశీలించి, అవసరమైన చర్యలు చేపట్టడంతో పాటు నిర్ణీత గడువులోగా పరిష్కరించాలని సంబంధిత శాఖల అధికారులను ఆదేశించినట్లు పేర్కొంది. ప్రజా సమస్యల పరిష్కారానికి ప్రాధాన్యతనిస్తూ, పౌరులకు మెరుగైన సేవలు అందించేందుకు కట్టుబడి ఉన్నామని సైబరాబాద్ మున్సిపల్ కార్పొరేషన్ పునరుద్ఘాటించింది.
