శేరిలింగంప‌ల్లి, అక్టోబ‌ర్ 8 (న‌మ‌స్తే శేరిలింగంప‌ల్లి): రోడ్డుపై ఒంటరిగా తిరుగుతున్న ఆరేళ్ల బాలుడిని రాయదుర్గం పోలీసులు రక్షించి, కేవలం రెండు గంటల్లో అతడి తండ్రిని గుర్తించి అప్పగించారు. రాయదుర్గం పోలీస్ స్టేషన్ పరిధిలోని KGN జిరాక్స్ ఎదురుగా ఓ ఆరేళ్ల బాలుడు ఒంటరిగా తిరుగుతున్నట్లు గురువారం సాయంత్రం 4 గంటల సమయంలో డయల్-112కు సమాచారం అందింది. వెంటనే రాయదుర్గం పీఎస్ పెట్రోల్-2 సిబ్బంది హెడ్ కానిస్టేబుల్ జి. ఆనంద్‌, ఏఆర్ పీసీ కె. అశోక్ అక్కడికి చేరుకుని బాలుడిని రక్షించి పోలీస్ స్టేషన్‌కు తీసుకెళ్లారు.
రాయదుర్గం ఇన్‌స్పెక్ట‌ర్ భూప‌తి ఆదేశాలతో పెట్రోల్ సిబ్బంది బాలుడి తల్లిదండ్రుల ఆచూకీ కోసం పరిసర ప్రాంతాల్లో విచారణ చేపట్టారు. గచ్చిబౌలి ఎక్స్ రోడ్ పరిసరాల్లో వివరాలు సేకరించి, అందుబాటులో ఉన్న సమాచారాన్ని పరిశీలించారు. ఈ క్రమంలో సాయంత్రం 6 గంటల సమయంలో గచ్చిబౌలిలోని ఇందిరానగర్‌లో బాలుడి తండ్రిని గుర్తించారు. బాలుడిని సత్యం (6)గా, అతడి తండ్రిని ముకేశ్ గా పోలీసులు గుర్తించారు. ముకేశ్ గచ్చిబౌలి ఇందిరానగర్ లో నివాసం ఉంటూ గృహ కార్మికుడిగా పనిచేస్తున్నట్లు తెలిపారు. అతడి స్వస్థలం బిహార్‌లోని రోహ్తాస్ జిల్లా ససారం గ్రామంగా పోలీసులు వెల్లడించారు. ముకేశ్ తెలిపిన వివరాల ప్రకారం.. సుమారు రెండేళ్ల క్రితం భార్యతో కలిసి బిహార్ నుంచి హైదరాబాద్‌కు వచ్చి ఇక్కడ గృహ కార్మికుడిగా పనిచేస్తున్నాడు. తగిన ధ్రువీకరణ అనంతరం బాలుడిని పోలీసులు సురక్షితంగా అతడి తండ్రికి అప్పగించారు. దీంతో బాలుడు తిరిగి కుటుంబ సభ్యుల చెంతకు చేరాడు.
డయల్-112కు వచ్చిన సమాచారంపై వెంటనే స్పందించి బాలుడిని రక్షించడంతో పాటు, తల్లిదండ్రులను గుర్తించేందుకు చురుకుగా వ్యవహరించిన రాయదుర్గం పీఎస్ పెట్రోల్-2 సిబ్బందిని ఉన్నతాధికారులు అభినందించారు. బాలుడిని సురక్షితంగా కుటుంబానికి చేర్చడంలో పోలీసుల అప్రమత్తత, వేగవంతమైన స్పందన కీలకంగా నిలిచింది.
