శేరిలింగంపల్లి, ఆగస్టు 1 (నమస్తే శేరిలింగంపల్లి): ప్రపంచ మానవ అక్రమ రవాణా నిరోధక దినోత్సవాన్ని పురస్కరించుకుని తెలంగాణలోని సంగారెడ్డి, జనగామ, యాదాద్రి భువనగిరి జిల్లాల్లో బాలల అక్రమ రవాణా నిరోధానికి స్పందన కల్చరల్ ఆర్గనైజేషన్ ఫర్ ప్రోగ్రెసివ్ ఎడ్యుకేషన్ (స్కోప్) ప్రత్యేక కార్యాచరణను ప్రారంభించింది. న్యూఢిల్లీలో ప్రారంభమైన దేశవ్యాప్త జాతీయ బాలల అక్రమ రవాణా నిరోధక ప్రచారంలో భాగంగా ఈ కార్యక్రమాన్ని చేపట్టినట్లు సంస్థ ప్రకటించింది. బాలలకు సురక్షితమైన జిల్లాల నిర్మాణమే లక్ష్యంగా తెలంగాణ ప్రభుత్వం, జిల్లా యంత్రాంగం, పోలీసు శాఖ, బాలల సంక్షేమ సంస్థలు, పాఠశాలలు, సామాజిక సంస్థలతో సమన్వయంగా పనిచేస్తామని స్కోప్ తెలిపింది.
ప్రచారంలో భాగంగా గ్రామాలు, పాఠశాలలు, కళాశాలలు, పట్టణ ప్రాంతాల్లో అవగాహన కార్యక్రమాలు నిర్వహించడం, అక్రమ రవాణా ముప్పు ఉన్న పేద, అసురక్షిత కుటుంబాలను గుర్తించడం, ప్రభుత్వ సంక్షేమ పథకాలతో అనుసంధానం చేయడం, పిల్లల విద్య కొనసాగేందుకు రక్షణ వ్యవస్థలను బలోపేతం చేయడం, అక్రమ రవాణాదారులపై చట్టపరమైన చర్యలకు సహకరించడం, బాధిత చిన్నారుల పునరావాసానికి తోడ్పాటు అందించడం వంటి కార్యక్రమాలు చేపట్టనున్నట్లు వెల్లడించింది. ఈ ప్రకటన న్యూఢిల్లీలోని కాన్స్టిట్యూషన్ క్లబ్ ఆఫ్ ఇండియాలో నిర్వహించిన నాలుగు రోజుల జాతీయ సదస్సు బాలల హక్కులు, సామర్థ్యం, శ్రేయస్సు సాధన అనంతరం వెలువడింది. జస్ట్ రైట్స్ ఫర్ చిల్డ్రన్ (జేఆర్సీ) ఆధ్వర్యంలో జరిగిన ఈ సదస్సుకు దేశంలోని 782 జిల్లాల నుంచి భాగస్వామ్య సంస్థల ప్రతినిధులు హాజరయ్యారు.
జేఆర్సీ దేశవ్యాప్తంగా 250కు పైగా పౌర సమాజ సంస్థలతో కలిసి బాలల అక్రమ రవాణా, బాల కార్మికత్వం, బాల్య వివాహాలు, లైంగిక దోపిడీ నిర్మూలన కోసం పనిచేస్తోందని, 2030 నాటికి అక్రమ రవాణా రహిత భారతదేశం లక్ష్యంగా ముందుకు సాగుతోందని పేర్కొన్నారు. ఏప్రిల్ 2023 నుంచి డిసెంబర్ 2025 వరకు దేశవ్యాప్తంగా 1,22,516 మంది చిన్నారులను అక్రమ రవాణా నుంచి రక్షించినట్లు సదస్సులో వెల్లడించారు. సదస్సును కేంద్ర మహిళా, శిశు అభివృద్ధి శాఖ సహాయ మంత్రి సావిత్రి ఠాకూర్ ప్రారంభించారు. పిల్లలను దోపిడీ నుంచి రక్షించడంలో పౌర సమాజ సంస్థల పాత్ర కీలకమని ఆమె కొనియాడారు. ఒక్క చిన్నారి ప్రాణాన్ని కాపాడటం కూడా గొప్ప సేవ అని పేర్కొంటూ, బాలల రక్షణ కోసం పనిచేస్తున్న స్వచ్ఛంద సంస్థల సేవలను అభినందించారు.
స్కోప్ డైరెక్టర్ డా. బండి సాయన్న మాట్లాడుతూ భారతదేశంలో బాలల అక్రమ రవాణా ఇప్పటికీ తీవ్రమైన సామాజిక సమస్యగా కొనసాగుతోందన్నారు. ప్రభుత్వ గణాంకాల ప్రకారం రోజుకు సగటున ఆరుగురు పిల్లలు అక్రమ రవాణాకు గురవుతుండగా, మరో ఐదుగురు బలవంతపు కార్మికత్వంలోకి నెట్టబడుతున్నారని తెలిపారు. ప్రతి గంటకు సుమారు 11 మంది పిల్లలు అదృశ్యమవుతున్నారని, వారిలో చాలా మంది చివరకు అక్రమ రవాణా బారిన పడుతున్నారని ఆందోళన వ్యక్తం చేశారు. అక్రమ రవాణాదారులు ఎక్కువగా స్థానికంగా పరిచయం ఉన్న వ్యక్తులే ఉంటారని, పేద కుటుంబాలను ఉద్యోగం, విద్య, మంచి భవిష్యత్తు పేరుతో మోసం చేసి పిల్లలను బంధిత కార్మికత్వం, గృహ దాస్యం, ప్రమాదకర పనులు, లైంగిక దోపిడీ వైపు నెట్టివేస్తున్నారని ఆయన పేర్కొన్నారు. ప్రభుత్వ శాఖలు, జిల్లా యంత్రాంగంతో కలిసి అసురక్షిత కుటుంబాలను గుర్తించి, పిల్లలు చదువులో కొనసాగేందుకు చర్యలు తీసుకోవడంతో పాటు, బాధిత చిన్నారులకు చట్టపరమైన సహాయం, కౌన్సెలింగ్, విద్యా మద్దతు, పునరావాసం, సమాజంలో గౌరవప్రదమైన పునఃస్థాపన కల్పిస్తామని డా. సాయన్న తెలిపారు.
బాలల భద్రత కోసం పౌరులు, తల్లిదండ్రులు, ఉపాధ్యాయులు, యువజన సంఘాలు, స్థానిక సంస్థలు ఈ ప్రచారంలో భాగస్వాములు కావాలని స్కోప్ పిలుపునిచ్చింది. అనుమానాస్పద కార్యకలాపాలను వెంటనే అధికారులకు తెలియజేయడం, ప్రమాదంలో ఉన్న కుటుంబాలకు అండగా నిలవడం ప్రతి ఒక్కరి సామాజిక బాధ్యత అని పేర్కొంది.
