నమస్తే శేరిలింగంపల్లి: చందానగర్‌లోని విశాఖ శ్రీ శారదా పీఠ పాలిత శ్రీ వేంకటేశ్వర స్వామి దేవాలయ సముదాయంలో శ్రావణ శుక్రవారం సందర్భంగా ప్రత్యేక పూజలు నిర్వహించారు. ఆలయ ప్ర‌ధానార్చ‌కులు, పీఠం రాష్ట్ర ఆగ‌మ స‌ల‌హాదారు శ్రీ సుద‌ర్శ‌నం స‌త్య‌సాయి ప‌ర్య‌వేక్ష‌ణ‌లో సుప్రభాత సేవ, నిత్య అర్చనలు, ప్రసాద నివేదన, ఉభదేవేరులతో శ్రీవారికి విశేష పంచామృత అభిషేకం, విశేష పుష్పాలంకర‌ణ త‌దిత‌ర కార్య‌క్ర‌మాలు నిర్వహించారు. మహిళ భక్తులచే శ్రీ వరమహలక్ష్మీ సహస్ర నామ పారాయణం, వరలక్ష్మీ అమ్మ వారికి లక్ష కుంకుమార్చన, విశేష హార‌తి నిర్వహించారు. ఆలయ పాల‌క మండ‌లి స‌భ్యులు, సేవ స‌మితి స‌భ్యులు, ప‌రిస‌ర ప్రాంతాల భ‌క్తులు పెద్ద సంఖ్య‌లో విచ్చేసి అమ్మవారిని ద‌ర్శించుకున్నారు.
Advertisement
