నమస్తే శేరిలింగంపల్లి: జిల్లా స్థాయి తైక్వాండో ఛాంపియన్‌షిప్ లో చందానగర్ పీజేఆర్ స్టేడియంకు చెందిన క్రీడాకారుడు వెంకటేష్ కంకణాల సత్తా చాటాడు. బిహెచ్ఈఎల్ ఎల్ఐజీలో ఉమ్మడి మెదక్ జిల్లా 12వ తైక్వాండో ఛాంపియన్‌షిప్ 2022 పోటీలు ఘనంగా నిర్వహించారు. ఈ పోటీల్లో ఉమ్మడి మెదక్ జిల్లాల నుంచి పలు పాఠశాలలు, కళాశాలలు, క్రీడా ప్రాంగణాలకు చెందిన క్రీడాకారులు పెద్ద సంఖ్యలో పాల్గొన్నారు. ఈ క్రమంలోనే చందానగర్ పీజేఆర్ స్టేడియంకు చెందిన క్రీడాకారుడు వెంకటేష్ కంకణాల 80 కిలోల పైన సీనియర్ కేటగిరిలో భాగస్వామ్యమయ్యాడు.
పోటీలో అద్భుత ప్రతిభ కనబరిచిన వెంకటేష్ కంకణాల స్వర్ణ పతకాన్ని కైవసం చేసుకున్నాడు. దీంతో జీహెచ్ఎంసీ శేరిలింగంపల్లి జోనల్ స్పోర్ట్స్ అసిస్టెంట్ డైరెక్టర్, పీజేఆర్ స్టేడియం ఇంచార్జ్ వీరానంద్ అదేవిధంగా స్థానిక క్రీడా రంగ, రాజకీయ ప్రముఖులు, వారి కుటుంబ సభ్యులు వెంకటేష్ ను, అతనికి అద్భుతమైన శిక్షణ ఇచ్చిన కోచ్ శ్రీకాంత్ లను ప్రత్యేకంగా అభినందించారు.
