శేరిలింగంప‌ల్లి, అక్టోబర్ 14 (న‌మ‌స్తే శేరిలింగంప‌ల్లి): మాదాపూర్‌లో ఎండీఎంఏ (MDMA) మాదకద్రవ్యాలు విక్రయిస్తున్న ముగ్గురు వ్యక్తులను సైబరాబాద్ పరిధిలోని మాదాపూర్ పోలీసులు అరెస్ట్ చేశారు. వారి వద్ద నుంచి ఒక గ్రాము ఎండీఎంఏగా అనుమానిస్తున్న మాదక పదార్థంతోపాటు మూడు సెల్‌ఫోన్లను స్వాధీనం చేసుకున్నారు. ఈ మేరకు మాదాపూర్ పోలీస్ స్టేషన్ అధికారులు ప్రకటన విడుదల చేశారు. పోలీసుల వివరాల ప్రకారం.. అక్టోబర్ 13న మధ్యాహ్నం సుమారు 3.10 గంటలకు అందిన విశ్వసనీయ సమాచారం మేరకు, సిద్ది వినాయక నగర్‌లోని రాజ్ టవర్స్ సమీపంలో పోలీసులు దాడి నిర్వహించారు. ఈ సందర్భంగా డ్రగ్స్ విక్రయం, కొనుగోలు, వినియోగానికి సంబంధించి ముగ్గురిని అదుపులోకి తీసుకున్నారు.
అరెస్టయిన వారిలో బంజారాహిల్స్‌కు చెందిన కట్ల మాధవ్ అలియాస్ టోనీ (25) డ్రగ్స్ విక్రేతగా, మాదాపూర్‌కు చెందిన నామాల సిద్ధార్థ్ (25) సబ్ పెడ్లర్‌గా, బంజారాహిల్స్‌కు చెందిన ఎరుగు లోకేష్ (26) డ్రగ్స్ వినియోగదారుడిగా పోలీసులు గుర్తించారు. ప్రాథమిక విచారణలో కట్ల మాధవ్ బెంగళూరులో గుర్తుతెలియని వ్యక్తి వద్ద ఒక గ్రాము ఎండీఎంఏను రూ.6వేల‌కు కొనుగోలు చేసి హైదరాబాద్‌కు తీసుకొచ్చినట్లు వెల్లడైంది. అనంతరం అదే మాదక పదార్థాన్ని నామాల సిద్ధార్థ్‌కు రూ.10వేల‌కు విక్రయించినట్లు పోలీసులు తెలిపారు. సిద్ధార్థ్ ద్వారా లోకేష్‌తోపాటు మరికొందరికి డ్రగ్స్ సరఫరా అవుతున్నట్లు అనుమానిస్తున్నారు.
ఈ ఘటనపై మాదాపూర్ పోలీస్ స్టేషన్‌లో క్రైమ్ నంబర్ 1605/2026గా కేసు నమోదు చేశారు. ఎన్‌డీపీఎస్ చట్టంలోని సెక్షన్లు 8(c) రెడ్‌విత్ 22(a), 27 కింద కేసు నమోదు చేసిన పోలీసులు ముగ్గురు నిందితులను అరెస్ట్ చేసి న్యాయస్థానంలో హాజరుపరిచారు. డ్రగ్స్ సరఫరా వెనుక ఉన్న ఇతర వ్యక్తులను గుర్తించేందుకు దర్యాప్తు కొనసాగిస్తున్నారు. యువత మాదకద్రవ్యాలకు దూరంగా ఉండాలని, డ్రగ్స్ విక్రయాలు లేదా సరఫరాకు సంబంధించిన సమాచారం తెలిస్తే పోలీసులకు తెలియజేయాలని మాదాపూర్ పోలీసులు విజ్ఞప్తి చేశారు.
