శేరిలింగంపల్లి, అక్టోబ‌ర్ 9 (న‌మ‌స్తే శేరిలింగంపల్లి): గచ్చిబౌలి డివిజన్ పరిధిలోని గోపన్‌పల్లి సర్వే నంబర్ 21లో శ్మశానవాటిక స్థలం, ప్రభుత్వ భూమి, సహజ నాలా ఆక్రమణలపై కఠిన చర్యలు తీసుకోవాలని గచ్చిబౌలి మాజీ కార్పొరేటర్ వి. గంగాధర్ రెడ్డి కోరారు. ఈ మేరకు శేరిలింగంపల్లి ఎమ్మార్వో మహిపాల్ రెడ్డికి ఆయన వినతిపత్రం అందజేశారు. సర్వే నంబర్ 21లో గ్రామ ప్రజలకు అవసరమైన శ్మశానవాటిక స్థలంతో పాటు సహజ నాలా ఆక్రమణకు గురవుతున్నట్లు, ఆకృతి కన్స్ట్రక్షన్ సంస్థ ప్రభుత్వ భూమిలో అక్రమ నిర్మాణాలు చేపడుతున్నట్లు తమకు సమాచారం, ఫిర్యాదులు అందాయని గంగాధర్ రెడ్డి తెలిపారు. ఈ అంశంపై అధికారులు క్షేత్రస్థాయిలో సమగ్రంగా పరిశీలించి వాస్తవాలను నిర్ధారించాలని ఆయన కోరారు.
ప్రభుత్వ భూములు, చెరువులు, నాలాలు, శ్మశానవాటికలు వంటి ప్రజా అవసరాలకు సంబంధించిన స్థలాలను పరిరక్షించడం అధికారుల బాధ్యత అని గంగాధర్ రెడ్డి అన్నారు. గ్రామ ప్రజలకు శ్మశానవాటిక కేవలం ప్రభుత్వ భూమి మాత్రమే కాదని, సామాజిక, సాంస్కృతిక అవసరాలతో ముడిపడిన కీలకమైన ప్రజా స్థలమని పేర్కొన్నారు. ప్రతి కుటుంబం తమ ఆత్మీయులకు గౌరవప్రదంగా అంత్యక్రియలు నిర్వహించుకునే అవకాశం ఉండాలని, శ్మశానవాటిక స్థలాలు ఆక్రమణలకు గురైతే భవిష్యత్తులో గ్రామ ప్రజలు తీవ్ర ఇబ్బందులు ఎదుర్కొనే అవకాశం ఉంటుందని ఆందోళన వ్యక్తం చేశారు. అవసరమైన చోట హద్దురాళ్లు ఏర్పాటు చేసి, శ్మశానవాటికకు వెళ్లే మార్గాలు, అంత్యక్రియలు నిర్వహించే స్థలం ఎలాంటి అడ్డంకులు లేకుండా చర్యలు తీసుకోవాలని కోరారు.
సహజ నాలాల ప్రవాహ మార్గాలను ఆక్రమించి నిర్మాణాలు చేపడితే భారీ వర్షాల సమయంలో వరద నీరు సక్రమంగా ప్రవహించక పరిసర ప్రాంతాలు, కాలనీలు, గ్రామ ప్రజలు ఇబ్బందులు ఎదుర్కొనే ప్రమాదం ఉందని గంగాధర్ రెడ్డి హెచ్చరించారు. చెరువులకు నీరు చేరే సహజ మార్గాలు మూసుకుపోవడం వల్ల జలవనరుల పరిరక్షణకు విఘాతం కలగడంతో పాటు పర్యావరణ సమతుల్యత, భూగర్భ జలాలపై కూడా ప్రతికూల ప్రభావం పడే అవకాశం ఉందని పేర్కొన్నారు. ప్రభుత్వ భూములు, శ్మశానవాటికలు, సహజ నాలాలు ప్రజా ప్రయోజనాల కోసం పరిరక్షించాల్సిన ఆస్తులని గంగాధర్ రెడ్డి స్పష్టం చేశారు. రెవెన్యూ, మున్సిపల్, నీటిపారుదల శాఖల అధికారులు సమన్వయంతో సర్వే నిర్వహించి సర్వే నంబర్ 21లోని ప్రభుత్వ భూమి హద్దులు, శ్మశానవాటిక విస్తీర్ణం, నాలా అసలు మార్గం, ప్రస్తుత పరిస్థితులను అధికారిక రికార్డుల ఆధారంగా నిర్ధారించాలని ఆయన విజ్ఞప్తి చేశారు. ఆక్రమణలు, అక్రమ నిర్మాణాలు వాస్తవమని తేలితే బాధ్యులపై నిబంధనల ప్రకారం కఠిన చర్యలు తీసుకుని ప్రజా ఆస్తులను పరిరక్షించాలని గంగాధర్ రెడ్డి కోరారు.
