శేరిలింగంపల్లి, ఆగస్టు 17 (నమస్తే శేరిలింగంపల్లి): గౌలిదొడ్డిలో సైబరాబాద్ మున్సిపల్ కార్పొరేషన్ (సీఎంసీ) శేరిలింగంపల్లి జోన్ పరిధిలో కన్స్ట్రక్షన్ అండ్ డెమాలిషన్ (C & D) వేస్ట్ ట్రాన్స్ఫర్ స్టేషన్ ప్రారంభమైంది. Re Sustainability సంస్థ ఆధ్వర్యంలో ఏర్పాటు చేసిన ఈ కేంద్రాన్ని తెలంగాణ రాష్ట్ర ప్రభుత్వ స్పెషల్ చీఫ్ సెక్రటరీ ప్రారంభించారు. కార్యక్రమంలో సీఎంసీ కమిషనర్ సృజన, అదనపు కమిషనర్ (హెల్త్ అండ్ శానిటేషన్), శేరిలింగంపల్లి జోన్ జోనల్ కమిషనర్ నారాయణ్ అమిత్తో పాటు వివిధ శాఖల అధికారులు పాల్గొన్నారు.
నిర్మాణాలు, కూల్చివేతల ద్వారా ఉత్పత్తయ్యే C & D వ్యర్థాలను శాస్త్రీయంగా సేకరించడం, రవాణా చేయడం, ప్రాసెస్ చేసి రీసైక్లింగ్ చేయడం ఈ కేంద్రం ప్రధాన ఉద్దేశం. రోడ్లు, ఖాళీ స్థలాలు, డ్రెయిన్లు, ఇతర ప్రజా ప్రదేశాల్లో నిర్మాణ వ్యర్థాలను అక్రమంగా డంపింగ్ చేయడాన్ని అరికట్టడంలో ఈ కేంద్రం కీలకంగా పనిచేయనుంది. సీఎంసీ పరిధిలో ఇప్పటికే జీడిమెట్లలో C & D వేస్ట్ ప్రాసెసింగ్ ఫెసిలిటీ అందుబాటులో ఉంది. తాజాగా గౌలిదొడ్డిలో ఏర్పాటు చేసిన కేంద్రం నార్సింగి, నల్లగండ్ల, గచ్చిబౌలి, మాదాపూర్ వంటి ప్రాంతాలకు సమీపంలోని ట్రాన్స్ఫర్, అగ్రిగేషన్ పాయింట్గా పనిచేయనుంది. దీంతో C & D వ్యర్థాల సేకరణ వేగవంతం కావడంతో పాటు రవాణా దూరం తగ్గుతుంది. వాహనాల సమర్థ వినియోగం, రవాణా ఖర్చుల తగ్గింపు కూడా సాధ్యమవుతుందని అధికారులు తెలిపారు.
G.O.Rt.No.626లో పేర్కొన్న నిబంధనల అమలుకు ఈ కేంద్రం దోహదపడనుంది. C & D వ్యర్థాల శాస్త్రీయ నిర్వహణ, రీసైక్లింగ్, పునర్వినియోగాన్ని ప్రోత్సహించడంతో పాటు రీసైకిల్ చేసిన నిర్మాణ సామగ్రి వినియోగం, డిస్పోజల్ సర్టిఫికేషన్, అధీకృత సేకరణ–రవాణా, అనధికార డంపింగ్ను నిరోధించడం వంటి చర్యలకు ఇది సహకరించనుంది. C & D వ్యర్థాలను కేవలం వ్యర్థాలుగా కాకుండా వనరుగా పరిగణించి సర్క్యులర్ విధానాన్ని అవలంబించాలని స్పెషల్ చీఫ్ సెక్రటరీ సూచించారు. సీసీ రోడ్లు, ఇతర సివిల్ పనుల ద్వారా ఉత్పత్తయ్యే C & D వ్యర్థాలను అధీకృత ఏజెన్సీలకు అప్పగించాలని, వాటి సేకరణ, రవాణా, ప్రాసెసింగ్ ఖర్చులను నిబంధనల ప్రకారం సంబంధిత పనుల అంచనాల్లో చేర్చాలని సూచించారు.
అధీకృత సేవల ద్వారా డోర్స్టెప్ C & D వేస్ట్ కలెక్షన్, ప్రాసెసింగ్ సదుపాయం కూడా అందుబాటులో ఉంటుంది. ఇందుకు వర్తించే యూజర్ ఛార్జీలు నిర్ణీత నిబంధనల ప్రకారం ఉంటాయి. ఈ కేంద్రం ద్వారా అక్రమ డంపింగ్ను అరికట్టడం, డ్రెయిన్లు-జల వనరులను పరిరక్షించడం, C&D వ్యర్థాల రీసైక్లింగ్ను పెంచడం, కొత్త నిర్మాణ పదార్థాలపై ఆధారపడటాన్ని తగ్గించడం, నిర్మాణ రంగంలో సర్క్యులర్ ఎకానమీని ప్రోత్సహించడం సాధ్యమవుతుంది. గౌలిదొడ్డి C & D వేస్ట్ ట్రాన్స్ఫర్ స్టేషన్ పశ్చిమ సైబరాబాద్లో వేగంగా అభివృద్ధి చెందుతున్న ప్రాంతాల్లో నిర్మాణ వ్యర్థాల నిర్వహణను మరింత బలోపేతం చేయనుంది. C & D వ్యర్థాల నిర్వహణను వేస్ట్ డిస్పోజల్ నుంచి రిసోర్స్ రికవరీ, సర్క్యులర్ సస్టెయినబిలిటీ వైపు తీసుకెళ్లే చర్యల్లో ఇది కీలకంగా నిలవనుంది. రోడ్లపై C & D వ్యర్థాలు లేకుండా క్లీన్, గ్రీన్, సస్టెయినబుల్ సైబరాబాద్ నిర్మాణానికి ఈ కేంద్రం దోహదపడుతుందని అధికారులు పేర్కొన్నారు.
