శేరిలింగంపల్లి, ఆగస్టు 5 (నమస్తే శేరిలింగంపల్లి): మియాపూర్ పరిధిలో మిర్చి స్ప్రే చల్లి మహిళ మెడలోని మంగళసూత్రాన్ని అపహరించిన గొలుసు దొంగను పోలీసులు అరెస్ట్ చేశారు. నిందితుడి వద్ద నుంచి సుమారు 4 తులాల బంగారు మంగళసూత్రంతోపాటు నేరానికి ఉపయోగించిన ఆయుర్వేద మందుల ప్యాకెట్ను స్వాధీనం చేసుకున్నారు. పోలీసులు తెలిపిన వివరాల ప్రకారం.. ఆంధ్రప్రదేశ్లోని ప్రకాశం జిల్లా కనిగిరికి చెందిన షేక్ ఖాజా అర్షల్ (20) అనే విద్యార్థి ఈ కేసులో నిందితుడు. జూలై 31న బి. అధినారాయణ ఫిర్యాదు మేరకు కేసు నమోదు చేశారు. కొరియర్ డెలివరీ బాయ్గా నటిస్తూ ఆయుర్వేద మందుల ప్యాకెట్తో బాధితుడి ఇంటికి వెళ్లిన నిందితుడు, ఇంట్లో మహిళ ఒక్కరే ఉన్నారని నిర్ధారించుకున్న తర్వాత ఆమె ముఖంపై మిర్చి స్ప్రే చల్లి, సుమారు 4 తులాల బంగారు మంగళసూత్రాన్ని లాక్కొని పరారయ్యాడు.
కేసు నమోదు చేసిన మియాపూర్ పోలీసులు సీసీటీవీ ఫుటేజీలు, సాంకేతిక ఆధారాలు, శాస్త్రీయ సాక్ష్యాలను విశ్లేషించి నిందితుడిని గుర్తించారు. అనంతరం ప్రకాశం జిల్లా కనిగిరిలో అతడిని అరెస్ట్ చేసి, అతని ఒప్పుకోలు మేరకు అపహరించిన బంగారు మంగళసూత్రాన్ని స్వాధీనం చేసుకున్నారు. నిందితుడిపై గతంలో పలు కేసులు సైతం నమోదయ్యాయి. కనిగిరి పోలీస్ స్టేషన్ పరిధిలో రెండు కేసులు ఉన్నట్లు పోలీసులు తెలిపారు. నిందితుడు కొరియర్ డెలివరీ ఏజెంట్గా నటిస్తూ, ఇంట్లో ఒంటరిగా ఉన్న మహిళలను లక్ష్యంగా చేసుకుని ముందుగా మిర్చి స్ప్రే చల్లి, అనంతరం బంగారు గొలుసులు అపహరిస్తున్నట్లు పోలీసులు తెలిపారు. తెలియని వ్యక్తులు కొరియర్ లేదా డెలివరీ ఏజెంట్లమని చెప్పి ఇంటి వద్దకు వస్తే, వారి వివరాలను పూర్తిగా ధ్రువీకరించిన తర్వాతే తలుపులు తీయాలని సూచించారు. అనుమానాస్పద వ్యక్తులు కనిపిస్తే వెంటనే 112 లేదా 100కు సమాచారం ఇవ్వాలని విజ్ఞప్తి చేశారు.
ఈ కేసును మియాపూర్ పోలీస్ స్టేషన్ ఎస్హెచ్ఓ పి. జయరాం, డిటెక్టివ్ ఇన్స్పెక్టర్ డి. విజయ్ నాయక్, ఎస్ఐ బి. నర్సింహా రెడ్డితో పాటు పోలీసు బృందం ఛేదించగా, కూకట్పల్లి జోన్ అదనపు డీసీపీ ఎం. సుదర్శన్, కేపీహెచ్బీ డివిజన్ ఏసీపీ రవి కిరణ్ రెడ్డి పర్యవేక్షించారు.
