శేరిలింగంపల్లి, జూన్ 1 (నమస్తే శేరిలింగంపల్లి): రాబోయే వర్షాకాలాన్ని దృష్టిలో ఉంచుకుని హైడ్రా కమిషనర్ కార్యాలయంలో హైడ్రా కమిషనర్ రంగనాథ్, సైబరాబాద్ మున్సిపల్ కార్పొరేషన్ (సీఎంసీ) కమిషనర్ సృజన సంయుక్తంగా వర్షాకాల సన్నద్ధతపై అంతర్శాఖ సమీక్ష సమావేశం నిర్వహించారు. సమావేశంలో హైడ్రా, సీఎంసీ, ట్రాఫిక్ పోలీసులు, హెచ్ఎండబ్ల్యూఎస్ఎస్బీ, ఇరిగేషన్, విద్యుత్ శాఖలతోపాటు ఇతర సంబంధిత విభాగాల అధికారులు పాల్గొన్నారు. వర్షాకాలానికి ముందస్తు సన్నద్ధత, కొనసాగుతున్న నివారణ చర్యల పురోగతి, శాఖల మధ్య సమన్వయం, అత్యవసర పరిస్థితుల్లో స్పందన వ్యవస్థల సామర్థ్యంపై సమగ్రంగా చర్చించారు. ప్రజలకు ఎలాంటి ఇబ్బందులు కలగకుండా ముందస్తు చర్యలు చేపట్టాలని అధికారులకు సూచించారు. సైబరాబాద్ పరిధిలో గుర్తించిన నీటి నిల్వ ప్రాంతాలు, సమస్యాత్మక రహదారులు, స్టార్మ్ వాటర్ డ్రైనేజీ వ్యవస్థలు, ట్రాఫిక్ నిర్వహణ, చెరువుల భద్రత, ప్రజారోగ్యం, అత్యవసర స్పందన వ్యవస్థలు, ప్రజా భద్రతకు సంబంధించిన అంశాలను ఇద్దరు కమిషనర్లు సమీక్షించారు.
భారీ వర్షాల సమయంలో నీటి నిల్వలను తగ్గించేందుకు నిరంతర పర్యవేక్షణతోపాటు క్షేత్రస్థాయిలో సమన్వయ చర్యలు చేపట్టాలని ఆదేశించారు. స్టార్మ్ వాటర్ డ్రైన్ల డీ-సిల్టింగ్ పనులను వేగవంతంగా పూర్తి చేసి, వర్షపు నీటి ప్రవాహానికి అడ్డంకులను తొలగించాలని సూచించారు. డ్రైనేజీ వ్యవస్థలో తలెత్తే సమస్యలను వెంటనే పరిష్కరించేలా చర్యలు తీసుకోవాలని పేర్కొన్నారు. వర్షాల సమయంలో ట్రాఫిక్ సమస్యలు తలెత్తకుండా ట్రాఫిక్ పోలీసులతో సమన్వయాన్ని మరింత బలోపేతం చేయాలని నిర్ణయించారు. నీటి నిల్వలకు గురయ్యే ప్రాంతాల్లో ప్రత్యామ్నాయ మార్గాలు, ట్రాఫిక్ మళ్లింపు ప్రణాళికలు సిద్ధం చేయడంతోపాటు ప్రజలకు ముందస్తు సమాచారం అందించే విధానాలపై చర్చించారు. ప్రధాన చెరువులు, నాలాలు, ఇతర జలవనరుల పరిస్థితిని సమీక్షించిన అధికారులు వరద ముప్పు ఉన్న ప్రాంతాల్లో ప్రత్యేక పర్యవేక్షణ చేపట్టాలని ఆదేశించారు. చెరువుల నీటి మట్టాలను నిరంతరం పరిశీలిస్తూ, వరదల సమయంలో ప్రజల భద్రతకు ఎలాంటి ఆటంకాలు కలగకుండా శాఖల మధ్య సమన్వయంతో ముందస్తు చర్యలు చేపట్టాలని సూచించారు.
బలమైన గాలులు, భారీ వర్షాల కారణంగా ప్రమాదకరంగా మారే చెట్ల కొమ్మల కత్తిరింపు, నిర్వహణ చర్యలను సమీక్షించారు. చెట్లు విరిగిపడే సంఘటనలకు తక్షణ స్పందన అందించేందుకు అవసరమైన సిబ్బంది, యంత్రాలు, పరికరాలను సిద్ధంగా ఉంచాలని అధికారులను ఆదేశించారు. అదేవిధంగా డిజాస్టర్ రెస్పాన్స్ ఫోర్స్ (డీఆర్ఎఫ్) బృందాలు, ఫీల్డ్ సిబ్బంది, పంపింగ్ యంత్రాలు, అత్యవసర పరికరాల సిద్ధతను పరిశీలించారు. అత్యవసర పరిస్థితుల్లో అన్ని శాఖలు సమన్వయంతో వేగంగా స్పందించేలా కార్యాచరణ రూపొందించాలని సూచించారు. వాతావరణ హెచ్చరికలు, సూచనలు, అత్యవసర సమాచారాన్ని ప్రజలకు సకాలంలో చేరవేయడం అత్యంత కీలకమని కమిషనర్లు పేర్కొన్నారు. ప్రతికూల వాతావరణ పరిస్థితుల సమయంలో ప్రజలకు సరైన సమాచారం అందించే కమ్యూనికేషన్ వ్యవస్థలను మరింత బలోపేతం చేయాలని ఆదేశించారు.
సీఎంసీ అధికారులు డీ-సిల్టింగ్ పనులు గణనీయంగా పూర్తయ్యాయని, వర్షాకాల సన్నద్ధత పనులను క్షేత్రస్థాయి తనిఖీలు, శాఖల సమీక్షలు, నిరంతర పర్యవేక్షణ ద్వారా పరిశీలిస్తున్నట్లు వివరించారు. సమావేశం ముగింపులో హైడ్రా కమిషనర్, సీఎంసీ కమిషనర్ అన్ని శాఖలు మిగిలిన సన్నద్ధత పనులను అత్యవసర ప్రాతిపదికన పూర్తి చేసి, ప్రజా భద్రతకు ఎలాంటి ఇబ్బందులు తలెత్తకుండా పూర్తి స్థాయి సన్నద్ధతతో పనిచేయాలని ఆదేశించారు. వర్షాకాలంలో నగర సేవల నిరంతర నిర్వహణ, ప్రజల భద్రత, అత్యవసర పరిస్థితుల్లో వేగవంతమైన స్పందన కోసం అన్ని శాఖలు సమన్వయంతో ముందుకు సాగుతున్నట్లు తెలిపారు.
