శేరిలింగంపల్లి, సెప్టెంబర్ 17 (నమస్తే శేరిలింగంపల్లి): సైబరాబాద్ మున్సిపల్ కార్పొరేషన్ (సీఎంసీ) ప్రధాన కార్యాలయంలో ప్రజా పాలన దినోత్సవాన్ని ఘనంగా నిర్వహించారు. సీఎంసీ కమిషనర్తో పాటు వివిధ శాఖల అధిపతులు, సీనియర్ అధికారులు, సిబ్బంది కార్యక్రమంలో పాల్గొన్నారు. ఈ సందర్భంగా జాతీయ పతాకాన్ని ఆవిష్కరించి, తెలంగాణ చారిత్రక ప్రస్థానంలో ప్రజల కోసం పోరాడిన అమరవీరులు, స్వాతంత్ర్య సమరయోధులకు ఘన నివాళులు అర్పించారు. వారి త్యాగాలను స్మరించుకుంటూ ప్రజాసేవ, సమానత్వం, ఐక్యత, ప్రజల భాగస్వామ్యం వంటి విలువలను గుర్తుచేశారు.
సెప్టెంబర్ 17 తెలంగాణ చరిత్రలో ప్రజల పోరాటాలు, త్యాగాలు, స్వేచ్ఛ కోసం వారి ఆకాంక్షలను గుర్తుచేసే చారిత్రక రోజని పేర్కొన్నారు. వారి త్యాగాల స్ఫూర్తితో ప్రజా సంక్షేమం, సమానత్వం, ఐక్యత, బాధ్యతాయుతమైన పాలన కోసం కృషి చేయాల్సిన అవసరం ఉందన్నారు. ప్రజా పాలనలో ప్రజల భాగస్వామ్యం, జవాబుదారీతనం, పారదర్శకత, ప్రజల అవసరాలకు స్పందించే పరిపాలన కీలకమని తెలిపారు. ప్రజలకు మెరుగైన పౌర సేవలు అందించడం, వారి సమస్యలను సమర్థవంతంగా పరిష్కరించడం, శాఖల మధ్య సమన్వయంతో సేవలను మరింత సమర్థవంతంగా అందించడం ప్రభుత్వ సంస్థల బాధ్యత అని పేర్కొన్నారు. ఈ సందర్భంగా సీఎంసీ అధికారులు, సిబ్బంది ప్రజాసేవా విలువలను పాటిస్తూ ప్రజా సంక్షేమం, మెరుగైన పౌర సేవలు, సైబరాబాద్ సమగ్ర అభివృద్ధి కోసం సమిష్టిగా కృషి చేయాలనే నిబద్ధతను పునరుద్ఘాటించారు.
