శేరిలింగంపల్లి, అక్టోబ‌ర్ 11 (న‌మ‌స్తే శేరిలింగంపల్లి): తెలంగాణ సంస్కృతి, సంప్రదాయాలకు ప్రతీకగా నిలిచే బతుకమ్మ సంబరాలు హఫీజ్‌పేట్ డివిజన్ పరిధిలోని BLY Homes వద్ద ఘనంగా జరిగాయి. బీజేపీ హఫీజ్‌పేట్ డివిజన్ కంటెస్టెడ్ కార్పొరేటర్ బోయిని అనుషా మహేష్ యాదవ్ ఆధ్వర్యంలో నిర్వహించిన ఈ వేడుకలకు చేవెళ్ల ఎంపీ కొండా విశ్వేశ్వర్ రెడ్డి ముఖ్య అతిథిగా హాజరయ్యారు. ఈ సందర్భంగా మహిళలకు బతుకమ్మ పండుగ శుభాకాంక్షలు తెలియజేశారు. ఎంపీ కొండా విశ్వేశ్వర్ రెడ్డి మాట్లాడుతూ.. బతుకమ్మ పండుగ తెలంగాణ సంస్కృతి, సంప్రదాయాలకు ప్రతీక అని పేర్కొన్నారు. ప్రకృతిని పూజిస్తూ రంగురంగుల పూలతో బతుకమ్మను అలంకరించి ఆరాధించడం ఈ పండుగ ప్రత్యేకత అని తెలిపారు. మహిళల ఐక్యతకు, తెలంగాణ ఆత్మగౌరవానికి, సాంస్కృతిక వారసత్వానికి బతుకమ్మ ప్రతీకగా నిలుస్తుందని అన్నారు. మన పండుగలు, సంప్రదాయాలను భావితరాలకు అందించాల్సిన బాధ్యత ప్రతి ఒక్కరిపై ఉందని పేర్కొన్నారు.
BLY Homes వద్ద నిర్వహించిన ఈ వేడుకలకు హఫీజ్‌పేట్‌తో పాటు పరిసర ప్రాంతాల నుంచి పెద్ద సంఖ్యలో మహిళలు తరలివచ్చారు. సంప్రదాయబద్ధంగా బతుకమ్మలను అలంకరించి పూజలు నిర్వహించారు. మహిళల ఆటపాటలు, రంగురంగుల పూలతో అలంకరించిన బతుకమ్మలు, సాంస్కృతిక కార్యక్రమాలు వేడుకలకు ప్రత్యేక ఆకర్షణగా నిలిచాయి. ఈ సందర్భంగా బతుకమ్మలను తీసుకువచ్చిన మహిళలకు, పోటీల్లో పాల్గొన్న వారికి ప్రోత్సాహకంగా బహుమతులు అందజేశారు. మహిళల ఉత్సాహభరిత భాగస్వామ్యంతో వేడుకలు పండుగ వాతావరణంలో కొనసాగాయి.
కార్యక్రమ నిర్వాహకురాలు బోయిని అనుషా మహేష్ యాదవ్ మాట్లాడుతూ.. తెలంగాణ సంస్కృతి, సంప్రదాయాలను ప్రతిబింబించే బతుకమ్మ పండుగను ప్రజల భాగస్వామ్యంతో ఘనంగా నిర్వహించడం సంతోషంగా ఉందన్నారు. వేడుకలకు పెద్ద సంఖ్యలో హాజరై విజయవంతం చేసిన మహిళలకు కృతజ్ఞతలు తెలిపారు. భవిష్యత్తులోనూ తెలంగాణ సంస్కృతి, సంప్రదాయాలను ప్రోత్సహించే కార్యక్రమాలను కొనసాగిస్తామని వెల్లడించారు. ఈ కార్యక్రమంలో శేరిలింగంపల్లి ప్రాంతానికి చెందిన పలువురు నాయకులు, మహిళలు, బీజేపీ కార్యకర్తలు పాల్గొన్నారు. మహిళల ఆటపాటలు, బతుకమ్మల సందడితో హఫీజ్‌పేట్ ప్రాంతం పండుగ శోభను సంతరించుకుంది.
