- ఎమ్మెల్సీ ఖమ్మం పాలేరు అసెంబ్లీ ఎన్నికల ఇంచార్జ్ రఘునాథ్ యాదవ్
నమస్తే శేరిలింగంపల్లి : వరంగల్-నల్గొండ-ఖమ్మం పట్టభద్రుల ఎన్నికల అభ్యర్థి తీన్మార్ మల్లన్నని అత్యధిక మెజారిటీతో గెలిపించాలని ఎమ్మెల్సీ ఖమ్మం పాలేరు అసెంబ్లీ ఎన్నికల ఇంచార్జ్ రఘునాథ్ యాదవ్ కోరారు. పట్టభద్రుల ఎమ్మెల్సీ ఎన్నికల్లో భాగంగా ఖమ్మం పాలేరు నియోజకవర్గంలో సన్నాహక సమావేశం జరిగింది. ఈ సమావేశంలో ఆయన పాల్గొని మాట్లాడారు. పదేళ్లు అధికారంలో ఉండి, అద్దాల మేడలు, జూబ్లిహిల్స్ గెస్ట్ హౌస్ లలో సేదతీరుతూ నిరుద్యోగ సమస్యలను ఏనాడు పట్టించుకోని కేటీఆర్ & బీఆర్ఎస్ ప్రభుత్వం… ఈ రోజు ఎంతో మంది నిరుద్యోగ యువతలకు ఉద్యోగ నోటిఫికేషన్లు రాక ఆత్మహత్యలు చేసుకుంటుంటే ఈ డ్రామారావు ఒక్కనాడు మాట్లాడలేదన్నారు. మరోవైపు నిరంతరం విద్యార్థులతో ఉంటూ, నిరుద్యోగుల తరపున పోరాడుతూ, ఎన్నో అక్రమ కేసులు వేసిన ఎగసిపడే కెరటంలా నిలబడిన వ్యక్తి తీన్మార్ మల్లన్న అని అన్నారు. ఇలాంటి విద్యావంతుడికి ఒక్క అవకాశం ఇవ్వాలని ఖమ్మం పట్టబద్ధులందరినీ రఘునాథ్ యాదవ్ కోరారు.
ఈ సమావేశంలో మంత్రి పొంగులేటి శ్రీనివాస రెడ్డి మాట్లాడుతూ 100 రోజుల్లో టీఎస్పీఎస్సీని ప్రక్షాళన చేసి, 30 వేల ఉద్యోగ పత్రాలు ఎల్బీ స్టేడియం సాక్షిగా ఇచ్చి, గ్రూప్ -1 మొదలు మెగా డీఎస్సీ వేలాది ఉద్యోగాల భర్తీకి ఇప్పటికే నోటిఫికేషన్ ఇచ్చింది కాంగ్రెస్ పార్టీ అన్నారు. డిసెంబర్ 31, 2024 లోపు 2 లక్షల ఉద్యోగ ఖాళీలను భర్తీ చేస్తామని హామీ ఇచ్చారు. ఖమ్మం జిల్లా పట్టభద్రులను ఉద్దేశించి వరంగల్ నల్గొండ ఖమ్మం ఎమ్మెల్సీ అభ్యర్థి తీన్మార్ మల్లన్న మాట్లాడుతూ తనపై ఎన్ని కేసులు వేసినా, నిరుద్యోగుల కోసం నా చివరి శ్వాస వరకు పోరాడుతానని, పట్టబద్రులుగా మీరు వేసే ఓటు, వృథా చేయనన్నారు. ఒక్క అవకాశం ఇచ్చి చూడండని పట్టభద్రుల ఎమ్మెల్సీ అభ్యర్థి తీన్మార్ మల్లన్న కోరారు.
ఈ సమావేశంలో పాల్గొన్న ఖమ్మం ఎంపీ అభ్యర్థి రఘురాం రెడ్డి, టీఎస్ఈ డబ్ల్యూఐ డీసీ కార్పోరేషన్ చైర్మన్ మువ్వా విజయ్ బాబు, మాజీ ఎమ్మెల్సీ బాలసాని లక్ష్మీ నారాయణ, రైట్ ఛాయిస్ అకాడమీ అధినేత కిరణ్, ఖమ్మం డీసీసీ అధ్యక్షుడు దుర్గ ప్రసాద్, ఖమ్మం జిల్లా కాంగ్రెస్, సీపీఐ, సీపీఎం, టీజేఎస్ నాయకులు, అన్ని మండల, గ్రామ, కాంగ్రెస్ నాయకులు పాల్గొన్నారు.
