శేరిలింగంపల్లి, అక్టోబ‌ర్ 28 (న‌మ‌స్తే శేరిలింగంపల్లి): శేరిలింగంపల్లి సర్కిల్‌లో వర్షపు నీటి సంరక్షణ, రహదారుల పరిశుభ్రతను మెరుగుపరిచే లక్ష్యంతో చేపట్టిన పైలట్ ప్రాజెక్టులను సైబరాబాద్ మున్సిపల్ కార్పొరేషన్ (CMC) కమిషనర్ సృజ‌న బుధవారం క్షేత్రస్థాయిలో పరిశీలించారు. పట్టణ మౌలిక సదుపాయాల అభివృద్ధి, పర్యావరణ పరిరక్షణకు ప్రాధాన్యమిస్తూ చేపడుతున్న పనుల పురోగతిని సమీక్షించారు. గుల్మోహర్ పార్క్ కాలనీలో సుమారు రూ.33 లక్షల అంచనా వ్యయంతో చేపడుతున్న వర్షపు నీటి సంరక్షణ పైలట్ ప్రాజెక్టును కమిషనర్ పరిశీలించారు. ఇందులో భాగంగా రీసైకిల్ చేసిన ప్లాస్టిక్ రిటెన్షన్ ట్యాంకులు, జియోటెక్స్‌టైల్‌తో కూడిన ఆధునిక మాడ్యులర్ మైక్రో-వాటర్‌షెడ్ వ్యవస్థను ఏర్పాటు చేస్తున్నారు. వర్షపు నీటిని నిల్వ చేయడం, భూగర్భ జలాల పున‌రుద్ధ‌రణను ప్రోత్సహించడం, పర్యావరణహిత మౌలిక సదుపాయాలను అభివృద్ధి చేయడం ఈ ప్రాజెక్టు ప్రధాన లక్ష్యాలు.
గోపన్‌పల్లి జంక్షన్ వద్ద బుచర్ మ్యాక్స్‌పోవా V80 రోడ్ స్వీపింగ్ యంత్రం పనితీరును కమిషనర్ పరిశీలించారు. రహదారుల శుభ్రతను మెరుగుపరచడం, యాంత్రిక పారిశుధ్య నిర్వహణను మరింత సమర్థవంతంగా అమలు చేయడంలో ఈ యంత్రం పనితీరును అంచనా వేశారు. ఈ పైలట్ కార్యక్రమం ద్వారా నగర రహదారుల పరిశుభ్రతను మెరుగుపరిచే అవకాశాలను పరిశీలిస్తున్నారు.
ఈ పర్యటనలో శేరిలింగంపల్లి జోనల్ కమిషనర్ నారాయ‌ణ్ అమిత్‌, శానిటేష‌న్ అదనపు కమిషనర్, సూపరింటెండింగ్ ఇంజినీర్, డిప్యూటీ కమిషనర్‌తో పాటు సంబంధిత అధికారులు పాల్గొన్నారు. కొనసాగుతున్న పనుల పురోగతిని నిరంతరం పర్యవేక్షించాలని, పైలట్ ప్రాజెక్టులను సమర్థవంతంగా అమలు చేయాలని, నిర్దేశించిన లక్ష్యాల మేరకు వాటి పనితీరును అంచనా వేయాలని కమిషనర్ అధికారులను ఆదేశించారు.
