శేరిలింగంపల్లి, అక్టోబ‌ర్ 25 (న‌మ‌స్తే శేరిలింగంపల్లి): శేరిలింగంపల్లి నియోజకవర్గంలో వరద ముంపు సమస్యకు శాశ్వత పరిష్కారం కల్పించే లక్ష్యంతో ఎస్‌ఎన్‌డీపీ ఫేజ్‌-2 కింద రూ.79 కోట్ల 58 లక్షల అంచనా వ్యయంతో నాలాల విస్తరణ పనులు చేపడుతున్నట్లు పీఏసీ చైర్మన్ ఆరెకపూడి గాంధీ తెలిపారు. పనులను వేగవంతం చేసి, అసంపూర్తిగా ఉన్న నిర్మాణాలను త్వరితగతిన పూర్తి చేసి ప్రజలకు అందుబాటులోకి తీసుకురావాలని అధికారులను ఆదేశించారు.
గచ్చిబౌలి డివిజన్ పరిధిలోని నల్లగండ్లలో నల్లగండ్ల చెరువు అలుగు నుంచి తారానగర్ వరకు కొనసాగుతున్న నాలా విస్తరణ పనులను గాంధీ పరిశీలించారు. ఈ ప్రాజెక్టులో భాగంగా రూ.24 కోట్ల వ్యయంతో నిర్మిస్తున్న ఆర్‌సీసీ (రెయిన్‌ఫోర్స్డ్ సిమెంట్ కాంక్రీట్) బాక్స్ డ్రైన్ నిర్మాణం, ఆర్‌సీసీ బెడ్‌, సైడ్‌వాల్స్‌ పనులను ఆయన తనిఖీ చేశారు. నిర్మాణ పనుల పురోగతిపై అధికారులతో సమీక్షించి పలు సూచనలు చేశారు. ఈ సందర్భంగా గాంధీ మాట్లాడుతూ.. ప్రతి వర్షాకాలంలో వరద నీరు కాలనీల్లోకి చేరడంతో లోతట్టు ప్రాంతాల ప్రజలు తీవ్ర ఇబ్బందులు ఎదుర్కొంటున్నారని పేర్కొన్నారు. గతంలో భారీ వర్షాలు కురిసినప్పుడు ప్రజలు రాత్రింబవళ్లు ఆందోళనకు గురయ్యేవారని తెలిపారు. ఇటువంటి సమస్యలు భవిష్యత్తులో పునరావృతం కాకుండా పటిష్టమైన చర్యలు తీసుకుంటున్నామని చెప్పారు. నాలాల విస్తరణ, ఆర్‌సీసీ బాక్స్ డ్రైన్ నిర్మాణం పూర్తయితే ముంపు ప్రాంతాల ప్రజలకు గణనీయమైన ఉపశమనం లభిస్తుందని ఆశాభావం వ్యక్తం చేశారు.
నాలాల విస్తరణ పనులను ప్రజా అవసరాలకు ప్రాధాన్యమిస్తూ యుద్ధప్రాతిపదికన పూర్తి చేయాలని గాంధీ అధికారులకు సూచించారు. నిర్మాణంలో నాణ్యతా ప్రమాణాలను తప్పనిసరిగా పాటించాలని, పనుల విషయంలో ఎక్కడా రాజీ పడకూడదని స్పష్టం చేశారు. వర్షాకాలాన్ని దృష్టిలో ఉంచుకుని పనులను వేగవంతం చేయాలని, నీటి ప్రవాహానికి ఎలాంటి ఆటంకాలు లేకుండా సరైన లెవల్స్‌ను నిర్ధారించుకుని నిర్మాణాలు చేపట్టాలని ఆదేశించారు. నాలాల నిర్మాణ సమయంలో ప్రజలకు ఎలాంటి ఇబ్బందులు కలగకుండా అవసరమైన ఏర్పాట్లు చేయాలని గాంధీ సూచించారు. ప్రధాన రహదారులపై పనులు చేపట్టే సమయంలో ట్రాఫిక్‌కు అంతరాయం కలగకుండా ప్రత్యామ్నాయ మార్గాలను సూచించాలని అధికారులకు తెలిపారు. నిర్మాణ పనుల వల్ల స్థానిక ప్రజలు, వాహనదారులు ఇబ్బందులు పడకుండా ముందస్తు చర్యలు తీసుకోవాలని పేర్కొన్నారు.
నాలాల విస్తరణ పనులకు సంబంధించి ఏవైనా సమస్యలు ఎదురైతే తన దృష్టికి తీసుకురావాలని, వాటి పరిష్కారానికి అవసరమైన సహాయ సహకారాలు అందిస్తానని గాంధీ తెలిపారు. శేరిలింగంపల్లి నియోజకవర్గంలో వరద ముంపు సమస్యకు శాశ్వత పరిష్కారం కల్పించే దిశగా అధికారులు సమన్వయంతో పనిచేసి, పెండింగ్‌ పనులను త్వరితగతిన పూర్తి చేయాలని ఆయన స్పష్టం చేశారు.
