శేరిలింగంపల్లి, సెప్టెంబర్ 16 (నమస్తే శేరిలింగంపల్లి): అంతర్జాతీయ ఓజోన్ పరిరక్షణ దినోత్సవాన్ని పురస్కరించుకుని లింగంపల్లి జిల్లా పరిషత్ ఉన్నత పాఠశాలలో విద్యార్థినీ విద్యార్థులకు ఓజోన్ పరిరక్షణ, పర్యావరణ పరిరక్షణపై అవగాహన కార్యక్రమాన్ని నిర్వహించారు. ఫ్రెండ్స్ వెల్ఫేర్ అసోసియేషన్ కన్వీనర్ తాడిబోయిన రామస్వామి యాదవ్ ఆధ్వర్యంలో జరిగిన ఈ కార్యక్రమానికి పాఠశాల ప్రధానోపాధ్యాయురాలు పి. అనుపమ అధ్యక్షత వహించారు. కార్యక్రమానికి ముఖ్య అతిథిగా హైదరాబాద్ సెంట్రల్ యూనివర్సిటీలోని సెంటర్ ఫర్ ఎర్త్, అట్మాస్ఫియరిక్ సైన్సెస్కు చెందిన ఆచార్య జి. కిషోర్ కుమార్ హాజరై విద్యార్థులను ఉద్దేశించి ప్రసంగించారు. సూర్యుడి నుంచి వెలువడే హానికరమైన అతినీలలోహిత (UV) కిరణాలను శోషించడంలో స్ట్రాటోస్ఫెరిక్ ఓజోన్ పొర కీలక పాత్ర పోషిస్తుందని, మానవులు, జంతువులు, మొక్కలు సహా భూమిపై జీవరాశులకు ఇది సహజ రక్షణ కవచంగా పనిచేస్తుందని వివరించారు.
అంటార్కిటికా ప్రాంతంలో ఓజోన్ క్షీణతను శాస్త్రవేత్తలు గుర్తించిన నేపథ్యంలో ప్రపంచ దేశాలు ఓజోన్ పొర పరిరక్షణకు చర్యలు చేపట్టాయని తెలిపారు. క్లోరోఫ్లోరోకార్బన్లు (CFCs), హాలాన్లు, ఇతర ఓజోన్-క్షీణక రసాయనాల వినియోగాన్ని నియంత్రించేందుకు 1987లో మాంట్రియల్ ప్రోటోకాల్ కుదిరిందని చెప్పారు. ఐక్యరాజ్యసమితి 1994లో సెప్టెంబర్ 16ను అంతర్జాతీయ ఓజోన్ పరిరక్షణ దినోత్సవంగా ప్రకటించిందన్నారు. ఈ ఏడాది సందేశంగా శీతలమైన భూగ్రహం కోసం ప్రపంచవ్యాప్త కార్యాచరణ – కిగాలి సవరణ కింద స్థిరమైన శీతలీకరణకు 10 ఏళ్ల ప్రస్థానంను ప్రచారం చేస్తున్నారని, ఓజోన్ పరిరక్షణతో పాటు పర్యావరణహిత శీతలీకరణ సాంకేతికతల ప్రాధాన్యతను ప్రజలకు తెలియజేయాల్సిన అవసరం ఉందని ఆచార్య కిషోర్ కుమార్ పేర్కొన్నారు.
భూమి ఉపరితలం నుంచి సుమారు 15–35 కిలోమీటర్ల ఎత్తులోని స్ట్రాటోస్ఫియర్లో ఓజోన్ అధికంగా ఉంటుందని, ఇది సూర్యుడి నుంచి వచ్చే హానికరమైన UV-B కిరణాలలో గణనీయమైన భాగాన్ని గ్రహిస్తుందని తెలిపారు. అయితే భూమికి సమీపంలోని ట్రోపోస్ఫియర్లో అధికంగా ఉండే ఓజోన్ వాయు కాలుష్యకారకంగా మారి మానవ ఆరోగ్యం, పంటలు, పర్యావరణ వ్యవస్థలపై ప్రతికూల ప్రభావం చూపుతుందని వివరించారు. ఓజోన్ పరిరక్షణతో పాటు వాతావరణ మార్పులను నియంత్రించేందుకు ప్రతి ఒక్కరూ బాధ్యతగా వ్యవహరించాలని పిలుపునిచ్చారు. అడవుల నరికివేతను అరికట్టడం, మొక్కలు, చెట్లను పెంచడం, పునరుత్పాదక ఇంధన వనరులను వినియోగించడం, ప్రకృతి వనరులను పొదుపుగా వినియోగించడం, ప్రజా రవాణాను ప్రోత్సహించడం, పర్యావరణహిత ఉత్పత్తులను వినియోగించడం వంటి చర్యలు చేపట్టాలని సూచించారు.
ఎయిర్ కండిషనర్లు, రిఫ్రిజిరేటర్లు వంటి శీతలీకరణ పరికరాల వినియోగంలో ఓజోన్-క్షీణక పదార్థాలు, అధిక గ్లోబల్ వార్మింగ్ పొటెన్షియల్ కలిగిన వాయువులకు బదులుగా పర్యావరణహిత ప్రత్యామ్నాయాలను ప్రోత్సహించాల్సిన అవసరం ఉందన్నారు. శీతలీకరణ పరికరాలను అవసరానికి అనుగుణంగా, శక్తి సామర్థ్యంతో వినియోగించాలని సూచించారు. అలాగే Reduce, Reuse, Recycle (3R) సూత్రాన్ని ప్రతి ఒక్కరూ దైనందిన జీవితంలో పాటించాలని, సింగిల్-యూజ్ ప్లాస్టిక్ వినియోగాన్ని తగ్గించి పునర్వినియోగ సంచులను ఉపయోగించాలని కోరారు. ఓజోన్ పొరను మనం రక్షిస్తే, అది మనలను రక్షిస్తుంది. ఓజోన్ పరిరక్షణ కేవలం ప్రభుత్వాల బాధ్యత మాత్రమే కాదు.. ప్రతి పౌరుడి సామాజిక బాధ్యత అని ఆచార్య కిషోర్ కుమార్ పేర్కొన్నారు. ప్రభుత్వాలు, స్వచ్ఛంద సంస్థలు, విద్యాసంస్థలు, పౌర సమాజం సమిష్టిగా కృషి చేసినప్పుడే పర్యావరణ పరిరక్షణ లక్ష్యాలను సాధించగలమన్నారు.
అనంతరం విద్యార్థులతో ఓజోన్ పరిరక్షణ ప్రతిజ్ఞ చేయించారు. ఓజోన్ పొరను కాపాడేందుకు, పర్యావరణాన్ని పరిరక్షించేందుకు తమ వంతు కృషి చేస్తామని విద్యార్థులు ప్రతిజ్ఞ చేశారు. కార్యక్రమంలో ఉపాధ్యాయినులు అనిత, సరిత, ఉపాధ్యాయుడు శ్రీకాంత్, ఫ్రెండ్స్ వెల్ఫేర్ అసోసియేషన్ సభ్యులు అమ్మయ్య చౌదరి, బాలన్న, విద్యార్థినీ విద్యార్థులు తదితరులు పాల్గొన్నారు.
