శేరిలింగంపల్లి, సెప్టెంబర్ 26 (నమస్తే శేరిలింగంపల్లి): గోకుల్ ప్లాట్స్ 80 ఫీట్ రోడ్డు విస్తరణ పనుల్లో క్రమపద్ధతి, పారదర్శకత, సమానత్వం పాటించాలని కోరుతూ స్థానిక నివాసితులు జీహెచ్ఎంసీ డిప్యూటీ కమిషనర్కు వినతిపత్రం సమర్పించారు. రోడ్డు విస్తరణకు తాము పూర్తిగా సహకరిస్తామని, అయితే పనుల అమలులో అందరికీ ఒకే నిబంధనలు వర్తించేలా చర్యలు తీసుకోవాలని కోరారు. ప్రస్తుతం క్షేత్రస్థాయిలో జరుగుతున్న పనుల విషయంలో స్థానికులకు పలు ఆందోళనలు ఉన్నాయని వారు పేర్కొన్నారు. రోడ్డు విస్తరణ పనులు నిర్ణయించిన ప్రణాళిక ప్రకారం వరుస క్రమంలో జరగడం లేదని తెలిపారు. కొన్ని భవనాల ముందు భాగాలపై వేగంగా చర్యలు తీసుకుంటూ, మరికొన్ని ఆస్తులను మినహాయిస్తున్నట్లు కనిపిస్తోందని, దీంతో స్థానికుల్లో పక్షపాతంపై అనుమానాలు వ్యక్తమవుతున్నాయని పేర్కొన్నారు.
అలాగే రోడ్డు విస్తరణకు సంబంధించిన కొలతలు, మార్కింగ్, తొలగింపు ప్రక్రియలో ఏకరీతి ప్రమాణాలు పాటించాలని నివాసితులు కోరారు. ప్రతి ఆస్తికి ఒకే నిబంధనలు వర్తింపజేయాలని, వ్యక్తిగత అభ్యర్థనలు లేదా ఇతర ప్రభావాలకు తావులేకుండా నిబంధనల ప్రకారమే చర్యలు తీసుకోవాలని విజ్ఞప్తి చేశారు. డిప్యూటీ కమిషనర్ స్వయంగా క్షేత్రస్థాయిలో పర్యటించి 80 ఫీట్ రోడ్డు విస్తరణ పనులను పరిశీలించాలని వారు కోరారు. రోడ్డు విస్తరణకు సంబంధించిన అధికారిక కొలతలు, మార్కింగ్ విధానం, ప్రణాళిక, అమలు తీరుపై స్థానిక నివాసులకు స్పష్టత ఇవ్వాలని విజ్ఞప్తి చేశారు. అభివృద్ధి పనులకు తాము పూర్తి సహకారం అందిస్తామని, అయితే పనులు పారదర్శకంగా, నిష్పక్షపాతంగా, క్రమపద్ధతిలో, అందరికీ సమాన న్యాయం జరిగేలా కొనసాగాలని మాత్రమే కోరుతున్నామని నివాసితులు తెలిపారు. సమస్యపై అత్యవసరంగా విచారణ జరిపి తగిన ఆదేశాలు జారీ చేయాలని కోరారు. స్థానిక స్థాయిలో సమస్యకు పరిష్కారం లభించకపోతే సంబంధిత ఉన్నతాధికారులను ఆశ్రయించాల్సి వస్తుందని గోకుల్ ప్లాట్స్ 80 ఫీట్ రోడ్డు నివాసితులు తెలిపారు.
