శేరిలింగంపల్లి, జూన్ 20 (నమస్తే శేరిలింగంపల్లి): సైబరాబాద్ మున్సిపల్ కార్పొరేషన్ పరిధిలోని కుత్బుల్లాపూర్ జోన్లో వర్షాకాల సంసిద్ధత, పారిశుద్ధ్య నిర్వహణ, అభివృద్ధి పనులు, పౌర సేవలపై కమిషనర్ సృజన సమగ్ర సమీక్ష నిర్వహించారు. జోన్ అధికారులతో జరిగిన సమావేశంలో ప్రజా సమస్యల పరిష్కారం, శాఖల సమన్వయం, పెండింగ్ పనుల పురోగతిపై విస్తృతంగా చర్చించారు. ఆమోదం పొందిన అభివృద్ధి పనులను నిర్ణీత గడువుల్లో పూర్తి చేయాలని, పెండింగ్లో ఉన్న ఇంజినీరింగ్ పనులను వేగవంతం చేయాలని కమిషనర్ అధికారులను ఆదేశించారు. టెండర్ ప్రక్రియలను సకాలంలో పూర్తి చేయడంతోపాటు క్షేత్రస్థాయిలో పర్యవేక్షణను మరింత బలోపేతం చేయాలని సూచించారు. వర్షాకాలాన్ని దృష్టిలో ఉంచుకుని నీటి నిల్వ ప్రాంతాలను నిరంతరం పర్యవేక్షించాలని, పోలీస్, డీఆర్ఎఫ్, హైడ్రా బృందాలతో సమన్వయంగా పనిచేయాలని అధికారులకు ఆదేశాలు జారీ చేశారు.
రోడ్డు తవ్వకాలు, మౌలిక వసతుల పనులు జరుగుతున్న ప్రాంతాల్లో భద్రతా ప్రమాణాలను తప్పనిసరిగా పాటించాలని స్పష్టం చేశారు. పారిశుద్ధ్య సేవల మెరుగుదల కోసం దీర్ఘకాలంగా గైర్హాజరైన సిబ్బంది స్థానంలో కొత్త కార్మికులను నియమించాలని, పచ్చ వ్యర్థాల నిర్వహణను సమర్థవంతంగా చేపట్టాలని సూచించారు. గార్బేజ్ వల్నరబుల్ పాయింట్ల (జీవీపీలు) నిర్మూలనకు చర్యలు వేగవంతం చేయాలని, దోమల నివారణ కార్యక్రమాలను రెసిడెంట్స్ వెల్ఫేర్ అసోసియేషన్ల సహకారంతో విస్తృత స్థాయిలో నిర్వహించాలని ఆదేశించారు. ప్రజా ఫిర్యాదుల పరిష్కారానికి అత్యంత ప్రాధాన్యత ఇవ్వాలని కమిషనర్ పేర్కొన్నారు. సోషల్ మీడియా, ప్రజావాణి తదితర వేదికల ద్వారా అందుతున్న ఫిర్యాదులను వెంటనే పరిష్కరించాలని సూచించారు. అలాగే వన్ డే – వన్ వార్డ్ కార్యక్రమాన్ని సమర్థవంతంగా అమలు చేస్తూ క్షేత్రస్థాయి పర్యటనలను క్రమం తప్పకుండా నిర్వహించాలని అధికారులను ఆదేశించారు.
కార్పొరేషన్కు చెందిన పార్కులు, మార్కెట్లు, కమ్యూనిటీ హాళ్లు, షాపింగ్ కాంప్లెక్స్లు, ఖాళీ స్థలాల పరిరక్షణ, నిర్వహణ, ఆదాయ వనరుల వినియోగంపై కూడా సమావేశంలో సమీక్ష జరిగింది. ఈ ఆస్తుల నిర్వహణకు సంబంధించిన పూర్తి వివరాలను సమర్పించాలని డిప్యూటీ కమిషనర్లకు కమిషనర్ సూచించారు. పౌరులకు మెరుగైన సేవలు అందించడంలో క్షేత్రస్థాయి పర్యవేక్షణ, బాధ్యతాయుత పరిపాలన, శాఖల మధ్య సమన్వయం కీలకమని కమిషనర్ స్పష్టం చేశారు.
