శేరిలింగంపల్లి, సెప్టెంబర్ 29 (నమస్తే శేరిలింగంపల్లి): సైబరాబాద్ మున్సిపల్ కార్పొరేషన్ (సీఎంసీ) పరిధిలోని సున్నం చెరువు, తమ్మిడి కుంట అభివృద్ధి పనులపై సీఎంసీ, హైడ్రా, హెచ్ఎండబ్ల్యూఎస్ & ఎస్బీ శాఖల ఉన్నతాధికారులు సంయుక్త సమన్వయ సమావేశం నిర్వహించారు. సీఎంసీ కమిషనర్ సృజన ఛాంబర్లో జరిగిన ఈ సమావేశంలో సీఎంసీ కమిషనర్, హైడ్రా కమిషనర్తో పాటు ఆయా శాఖల సీనియర్ అధికారులు పాల్గొన్నారు.
ముఖ్యమంత్రి చేతుల మీదుగా జరగనున్న ప్రారంభోత్సవాన్ని దృష్టిలో ఉంచుకుని ఆయా ప్రాంతాల్లో చేపట్టాల్సిన అభివృద్ధి పనులపై అధికారులు సమీక్షించారు. సున్నం చెరువు పరిసరాల్లో చేపట్టాల్సిన పలు అభివృద్ధి పనులపై చర్చించారు. ఇప్పటికే ఉన్న కల్వర్ట్ వరకు సెంట్రల్ మీడియన్ను పొడిగించడం, సున్నం చెరువు నుంచి కల్వర్ట్ వరకు ఫుట్పాత్ను విస్తరించడం వంటి పనులను చేపట్టాలని నిర్ణయించారు. అలాగే చెరువు పరిసరాల్లో అలంకరణ లైటింగ్, వీధి దీపాల ఏర్పాటు, పర్వత్ నగర్ నుంచి సున్నం చెరువుకు మెరుగైన రహదారి కనెక్టివిటీ కల్పించే పనులను కూడా సమీక్షించారు.
తమ్మిడి కుంట వద్ద వెనుక ప్రవేశ ద్వారం నుంచి ఏసీ బస్ స్టాప్ వరకు ఫుట్పాత్ కనెక్టివిటీ కల్పించే అంశంపై చర్చించారు. చెరువు పరిసరాల్లో అలంకరణ లైటింగ్ ఏర్పాటు, సింధు హాస్పిటల్కు అనుసంధాన రహదారి నిర్మాణం, తమ్మిడి కుంట నుంచి స్మైలైన్ డెంటల్ వైపు ఉన్న అవుట్లెట్ డ్రెయిన్కు రిటైనింగ్ వాల్ నిర్మాణానికి సంబంధించిన పనులపై కూడా అధికారులు సమీక్షించారు. గుర్తించిన అన్ని అభివృద్ధి పనులను సంబంధిత శాఖలు పరస్పర సమన్వయంతో చేపట్టాలని అధికారులు ఆదేశించారు. అవసరమైన చర్యలను వెంటనే ప్రారంభించి, నిర్దేశించిన పనులను సకాలంలో పూర్తి చేయాలని స్పష్టం చేశారు.
