శేరిలింగంపల్లి, నవంబర్ 16 (నమస్తే శేరిలింగంపల్లి): గచ్చిబౌలి పోలీస్ స్టేషన్ పరిధిలో ప్రభుత్వ నిబంధనలకు విరుద్ధంగా అక్రమంగా హుక్కా పార్లర్ నిర్వహిస్తున్న స్కై కేఫ్పై పోలీసులు దాడి చేశారు. వినియోగదారులకు హుక్కా సేవలు అందిస్తున్నట్లు అందిన విశ్వసనీయ సమాచారంతో సోమవారం తెల్లవారుజామున పోలీసులు తనిఖీలు నిర్వహించి, భారీగా హుక్కా సామగ్రితో పాటు కేఫ్లోని పలు వస్తువులను స్వాధీనం చేసుకున్నారు. నవంబర్ 16న తెల్లవారుజామున సుమారు 3:15 గంటలకు గచ్చిబౌలి పోలీస్ స్టేషన్లో ఎన్ఆర్ఓ విధులు నిర్వహిస్తున్న సబ్ ఇన్స్పెక్టర్ ఆర్. శరత్ చంద్రకు గచ్చిబౌలి వినాయక్ నగర్లోని స్కై కేఫ్లో అక్రమంగా హుక్కా పార్లర్ నిర్వహిస్తున్నట్లు సమాచారం అందింది. దీంతో ఆయన పెట్రోల్ మొబైల్-2 సిబ్బందితో కలిసి ఉదయం సుమారు 4 గంటలకు కేఫ్కు చేరుకుని తనిఖీలు చేపట్టారు. ఈ సందర్భంగా కేఫ్లో వినియోగదారులకు హుక్కా సేవలు అందిస్తున్నట్లు గుర్తించారు.

కేఫ్లో పనిచేస్తున్న సిబ్బందిని విచారించగా అర్చిత్ కుమార్ (27), బుక్య శివ (24), రోహిత్ మండల్ (38) వివరాలు వెల్లడించారు. వీరిలో అర్చిత్ కుమార్ వర్కర్గా, బుక్య శివ, రోహిత్ మండల్ హౌస్కీపింగ్ సిబ్బందిగా పనిచేస్తున్నట్లు తెలిసింది. వారి విచారణలో కేఫ్ను నిర్వహిస్తూ ఆహార పదార్థాలతో పాటు వినియోగదారులకు హుక్కా సేవలు అందిస్తున్న నిర్వాహకులుగా మహమ్మద్ మొహసినుద్దీన్, పాషా, సిరాజ్, నదీమ్, శ్రీనివాస్ రెడ్డి, మధుకర్ రెడ్డిల పేర్లు వెల్లడయ్యాయి. గతంలోనూ ఇదే తరహా అక్రమ కార్యకలాపాలకు పాల్పడినప్పటికీ, నిర్వాహకులు తిరిగి హుక్కా సేవలను కొనసాగిస్తున్నట్లు ఫిర్యాదులో పేర్కొన్నారు. పోలీసులు తనిఖీల్లో భాగంగా 12 హుక్కా పాట్స్, 20 హుక్కా పైపులు, రెండు బొగ్గు పెట్టెలు, నాలుగు ఫ్లేవర్ బాక్సులను స్వాధీనం చేసుకున్నారు. వీటితోపాటు 16 కుర్చీలు, ఒక ఎల్జీ ఓవెన్, రెండు రెడ్బుల్ రిఫ్రిజిరేటర్లు, ఒక కాఫీ గ్రైండర్, ఒక ఎల్జీ స్పీకర్, 50 అంగుళాల ఎల్జీ టెలివిజన్, ఒక కాఫీ మేకర్, ఒక ఎయిర్ కూలర్, ఒక మానిటర్ను కూడా స్వాధీనం చేసుకున్నారు.

స్వాధీనం చేసుకున్న వస్తువులను సంబంధిత ప్రక్రియ ప్రకారం నమోదు చేసి, కేఫ్లో పనిచేస్తున్న ముగ్గురు వ్యక్తులతో పాటు సామగ్రిని గచ్చిబౌలి పోలీస్ స్టేషన్కు తరలించారు. ఈ ఘటనపై స్కై కేఫ్ నిర్వాహకులు మహమ్మద్ మొహసినుద్దీన్, పాషా, సిరాజ్, నదీమ్, శ్రీనివాస్ రెడ్డి, మధుకర్ రెడ్డిలపై చట్టప్రకారం చర్యలు తీసుకోవాలని ఫిర్యాదుదారు కోరారు. దీంతో గచ్చిబౌలి పోలీసులు కేసు నమోదు చేసి తదుపరి దర్యాప్తు చేపట్టారు.





