నమస్తే శేరిలింగంపల్లి: నిర్మాణ‌దశలో ఉన్న రెండతస్తుల భవనంపై నుంచి గుర్తు తెలియని వ్యక్తి కింద పడి మృతిచెందిన సంఘటన చందానగర్ పోలీస్ స్టేషన్ పరిధిలో చోటుచేసుకుంది. పోలీసుల కథనం ప్రకారం వివరాలు ఇలా ఉన్నాయి. శేరిలింగంపల్లి నల్లగండ్ల హుడా లే అవుట్ ప్లాట్ నంబర్ 324 లోని 161 చదరపు గజాల స్థలంలో అప్పారెడ్డి గూడెం పద్మ అనే వ్యక్తి రెండంతస్తుల భవన నిర్మాణం చేపడుతున్నారు. శనివారం ఉదయం భవనంపై నుంచి 40 ఏళ్ల వయసు ఉన్న ఒక గుర్తు తెలియని వ్యక్తి పడిపోయినట్లు భవనం పక్కన నివాసం ఉంటున్న గోపీ అనే వ్యక్తి భవన యజమానురాలైన గూడెం పద్మకు ఫోన్ ద్వారా సమాచారం అందించారు. హుటాహుటిన అక్కడకు చేరుకుని స్పృహ కోల్పోయిన వ్యక్తిని 108 ద్వారా గాంధీ ఆస్పత్రికి తరలించారు. చికిత్స పొందుతూ వ్యక్తి మృతి చెందినట్లు విధుల్లో ఉన్న వైద్యులు తెలిపారు. అప్పారెడ్డి గూడెం పద్మ ఫిర్యాదు మేరకు కేసు నమోదు చేసుకున్నట్లు పోలీసులు తెలిపారు. ఆచూకీ తెలిసిన వారు 7901113092, 04027853911, 9490617100,100 పోన్ నంబర్లను సంప్రదించాలన్నారు.
