నమస్తే శేరిలింగంపల్లి: ఎంసీపీఐయూ రాష్ట్ర మహాసభలను విజయవంతం చేయాలని స్టాలిన్ నగర్ కార్యదర్శి నరిశెట్టి గణేష్ పేర్కొన్నారు. ఈ నెల 23,24,25 తేదీలలో నిర్వహించనున్న ఎంసీపీఐయూ రాష్ట్ర మహాసభల పోస్టర్ ను స్టాలిన్ నగర్ లో ఎంసీపీఐయూ నాయకులు విడుదల చేశారు. ఈ సందర్భంగా ఎంసీపీఐయూ మియాపూర్ డివిజన్ నాయకులు, స్టాలిన్ నగర్ కార్యదర్శి నరిశెట్టి గణేష్ మాట్లాడుతూ మియాపూర్ లోని నడిగడ్డ తండా వద్ద గల సోనీ గార్డెన్ లో ఎంసీపీఐయూ రాష్ట్ర 3వ మహాసభలను నిర్వహించడం జరుగుతుందన్నారు. మొదటి రోజు 23వ తేదీన మధ్యాహ్నం మియాపూర్ లో అమరజీవి కామ్రెడ్ తాండ్ర కుమార్ స్మారక స్థూపం ఆవిష్కరణ, సాయంత్రం భారీ బహరంగసభ ఉంటుందని తెలిపారు. మూడు రోజుల పాటు జరిగే మహాసభలకు జాతీయ నాయకులతో పాటు వివిధ జిల్లాల నుండి ప్రతినిధులు పాల్గొంటారన్నారు. రాజకీయ, నిర్మాణ, భవిష్యత్తు కార్యక్రమాలను రూపొందించుకోనున్నట్లు చెప్పారు. మహాసభలలో ప్రజలందరూ అధిక సంఖ్యలో హాజరై జయప్రదం చేయాలని కోరారు. ఈ కార్యక్రమంలో ఎంసీపీఐయూ స్టాలిన్ నగర్ నాయకులు యన్.నాగభూషణం, టి.నర్సింగ్, మైదంశెట్టి రాణి, జి.లావణ్య, దార లక్ష్మి తదితరులు పాల్గొన్నారు.
